Փաշինյանը շնորհավորել է ՄԹ թագավորի ծննդյան օրն ու հայտնել հարաբերությունները խորացնելու իր ցանկությունը

ՀՀ կառավարությունը կշարունակի հանձնառու մնալ Միացյալ Թագավորության հետ գործընկերային կապերի խորացմանը, հայտարարել է ՀՀ վարչապետ Նիկոլ Փաշինյանը Չարլզ III թագավորի ծննդյան օրվա կապակցությամբ իր շնորհավորական ուղերձում։

Միացյալ Թագավորության վարչապետ սըր Քեյր Սթարմերին ուղղված նամակում Փաշինյանը նշել է, որ Երևանը հանձնառու է համագործակցության ամրապնդմանը՝ առաջնորդվելով ռազմավարական երկխոսության ոգով։

«Հայաստանի կառավարությունը հանձնառու է խորացնել գործընկերային կապերն ու ամրապնդել երկկողմ համագործակցությունը՝ առաջնորդվելով Հայաստան-Միացյալ Թագավորություն ռազմավարական երկխոսության ոգով՝ ի շահ մեր երկրների և ժողովուրդների»,- գրել է Փաշինյանը։

2023 թվականի նոյեմբերին Լոնդոնում տեղի էին ունեցել հայ-բրիտանական պաշտպանական ռազմավարական վեցերորդ խորհրդակցությունները, որոնց արդյունքում կողմերն ստորագրել էին 2023-2024 թվականների պաշտպանական համագործակցության ծրագիրը։

2025 թվականի մայիսի 13-ին ՀՀ պաշտպանության նախարար Սուրեն Պապիկյանը Մեծ Բրիտանիայի պաշտպանության նախարար Լյուկ Փոլարդի հետ Բեռլինում քննարկել էր երկու երկրներում ռազմական կցորդների նշանակման հարցը։ Մայիսի վերջին ՀՀ-ն և ՄԹ-ն ստորագրել էին 2025-2026 թվականների պաշտպանական համագործակցության ծրագիրը։

Սթենֆորդի համալսարանի քաղաքագիտության դոկտոր Արթուր Խաչիկյանը 2023 թվականի դեկտեմբերին Armenia Today-ին մեկնաբանել էր Միացյալ Թագավորության հետ Հայաստանի շփումների ակտիվացումը և դա կապել Արևմուտքի և Ռուսաստանի միջև Ուկրաինայի իրավիճակի շուրջ հակամարտության հետ։