Հիմնական խնդիրն այն է, որ տնտեսվարողներն անհանգստանում են փաստաթղթավորել իրենց կարողությունները, ավելի շատ նախընտրում են մնալ ստվերում և ավելի մեծ եկամուտ ստանալ անհավասար պայմաններում, լրագրողներին ասել է ՊԵԿ նախագահ Էդուարդ Հակոբյանը՝ մեկնաբանելով ՓՄՁ-ների բողոքները շրջանառության հարկի ավելացման շուրջ։
Ըստ կոմիտեի նախագահի՝ կառավարությունը նախ ընդառաջ քայլ է արել փարատելու տնտեսվարողների մտահոգությունները, ներդրել 6-ամսյա աջակցության ծրագիր, որպեսսզի հարկ վճարողներն իրենց հարկային պարտավորությունները նույն մակարդակում պահեն՝ մինչև իրենք կհարմարվեն փաստաթղթավորմանն ու նոր հաշվարկային ռեժիմին։
«Ես բաց ու թափանցիկ եմ գործել, անգամ իմ էլեկտրոնային հասցեն եմ տրամադրել, ասել եմ՝ հարգելի քաղաքացիներ, ասեք՝ տեսնենք ի՞նչն է խնդիրը։ Երբ քաղաքացիները թվերը ներկայացնում են, շատերը չեն հասկանում, որ իրականում՝ այս նույն հարկման պայմաններում իրենց հարկը կարող է նույնիսկ նվազել, իսկ բարձրացումների դեպքում՝ չնչին բարձրացումներ են»,- ասել է Հակոբյանը։
Պաշտոնյան նշել է, որ շրջանառության հարկի բարձրացումից հետո ՓՄՁ-ների քանակն աճել է։
«Այդ խոսակցությունները ևս այն մասին են, որ նրանք պետք է հարմարվեն նոր ռեժիմին»,- նշել է Հակոբյանը։
2024-ի մայիսի 2-ի նիստում կառավարությունը որոշել էր բարձրացնել փոքր և միջին բիզնեսի շրջանառության հարկի դրույքաչափը՝ գործող 5%-ի փոխարեն սահմանելով 10% սահմանաչափ։ Փոքր և միջին բիզնեսի շրջանառության հարկի դրույքաչափը չբարձրացնելու և օրենքը կասեցնելու պահանջով բողոքի ակցիաներ էին տեղի ունեցել հունվարի 13-ին, 23-ին, 27-ին, 30-ին և փետրվարի 5-ին։
Փետրվարի 7-ին խորհրդարանում տնտեսվարողների և կառավարության ներկայացուցիչների հանդիպումից հետո գործարարները հայտարարել էին, որ այն արդյունք չի տվել։ Նրանք տեղեկացրել էին, որ շարունակելու են բողոքի ակցիաները։
