ՀԱՊԿ անդամ պետությունների զինծառայողների մասնակցությունը Հաղթանակի շքերթին Կարմիր հրապարակում խորհրդանշում է կազմակերպության երկրների միասնությունը, հայտարարել է դաշինքի միացյալ շտաբի պետ Անդրեյ Սերդյուկովը։
Գեներալ-գնդապետ ընդգծել է, որ Բելառուսի, Ղազախստանի, Ղրղզստանի և Տաջիկստանի զինված ուժերի շքերթային ստորաբաժանումների մասնակցությունը նպաստում է ռազմական եղբայրության ոգու պահպանմանը և «կոլեկտիվ անվտանգության համակարգի՝ առաջադրանքներ կատարելու պատրաստակամությանը»։
«Հաղթանակը ձեռք բերվեց մեր երկրների ժողովուրդների միասնության, անկոտրում տոկունության և հերոսական անձնազոհության շնորհիվ, ովքեր վճռորոշ ներդրում ունեցան նացիզմի պարտության մեջ»,- նշել է Սերդյուկովը։
Հայ զինվորականները, մինչդեռ, չեն մասնակցել շքերթին։
Վերջին մեկ տարում Հայաստանը չի մասնակցում ՀԱՊԿ-ի միջոցառումներին. 2024թ. փետրվարի 22-ին ՀՀ վարչապետ Նիկոլ Փաշինյանը France 24 հեռուստաալիքին տված հարցազրույցում ասել էր, որ Երևանը սառեցրել է իր մասնակցությունը ՀԱՊԿ-ին։ Հայաստանի արտաքին հետախուզական ծառայությունը 2025-ի հունվարի 23-ի զեկույցում կանխատեսել էր, որ անհավանական է՝ Հայաստանի անդամակցությունը կառույցին սառեցնելու հիմքերը վերացվեն, ինչը կհանգեցնի «անվտանգության այս կառույցի հեղինակության խաթարմանը և մյուս անդամ երկրների համար եզրակացություններ անելուն»։
Դաշինքից ի պատասխան հայտարարել էին, որ ՀԱՊԿ-ն աշխատանքային կապեր է պահպանում Երևանի հետ, իսկ Հայաստանի նկատմամբ կազմակերպության պարտավորությունները մնում են ուժի մեջ:
Մայիսի 7-ին Փաշինյանը հայտարարել էր, որ Հայաստանի և հանրապետության հարևանների տարածքային ամբողջականությունը ճանաչելու որոշումը կայացրել է ՀԱՊԿ-ի հետ երկխոսություններից հետո։
