«Քաղաքացիական պայմանագիրը» Նոր Նորքի թաղապետ Տիգրան Տեր-Մարգարյանի փոխարինման հարցն առայժմ թողել է Երևանի քաղաքապետ Տիգրան Ավինյանի վրա, գրել է «Հրապարակ»-ը։
Ըստ թերթի՝ եթե Ավինյանը չկարողանա հասնել նրան, որ ավագանու «Հանրապետություն» խմբակցությունն իր որոշմամբ նրան ուրիշով փոխարինի, ապա հարցը կքննարկվի ՔՊ վարչությունում, և հնարավոր է՝ իշխող ուժը հայտարարի կուսակցության հետ կոալիցիան խզելու մասին։
Լրատվականի տեղեկությամբ՝ ՔՊ-ում ընդվզման մեծ ալիք է հասունանում տեղի ունեցած միջադեպի թեմայով։ ԱԺ փոխխոսնակ Հակոբ Արշակյանը զրուցել է Փաշինյանի հետ թիմի անունից, սակայն որևէ հստակ պատասխան չի ստացել:
Ապրիլի 29-ին ակտիվիստ Արթուր Չախոյանը հայտարարել էր, որ Նոր Նորք վարչական շրջանի ղեկավարն սպառնացել, հայհոյել է իրեն և Երևանի ավագանու «Մայր Հայաստան» խմբակցության անդամ Մեսրոպ Մանուկյանին։ Վերջիններս թաղապետի նկարի վրա հեղուկ էին լցրել։ Չախոյանն ապրիլի 29-ին գրել էր, որ գնալու է թաղապետարան՝ հանրային քննարկմանը մասնակցելու նպատակով:
Ապրիլի 30-ին, երբ Չախոյանն այցելել էր թաղապետարան, ծեծկռտուք էր տեղի ունեցել վարչական շրջանի ղեկավարի, նրա աջակիցների և Չախոյանի միջև, որից հետո վերջինիս ոստիկանությունից վնասվածքներով տեղափոխել էին հիվանդանոց, այնուհետ մեղադրանք առաջադրել։ ՔԿ խոսնակը մայիսի 1-ին տեղեկացրել էր, որ ապրիլի 29-ին տեղի ունեցած դեպքի առթիվ նախաձեռնված քրվարույթի շրջանակներում մի խումբ անձանց կողմից խուլիգանություն կատարելու հատկանիշներով հանրային քրեական հետապնդում էր հարուցվել 2 անձի նկատմամբ։ Ապրիլի 30-ի դեպքի առնչությամբ հանրային քրեական հետապնդում էր հարուցվել 4 անձի նկատմամբ՝ մի խումբ անձանց կողմից ֆիզիկական ներգործության հատկանիշներով։ ԶԼՄ-ները գրել էին, որ մեղադրանք է առաջադրվել նաև Տեր-Մարգարյանին։
