Արցախի տեղեկատվական շտաբն արձագանքել է ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանի՝ ապրիլի 17-ի հարցազրույցում արված հայտարարությանը, թե «արցախցիները 2023 թվականին չեն կռվել»: Արցախի տեղեկատվական շտաբը Սուքիասյանին մեղադրել է «հոգեբանական ահաբեկչության» մեջ և Արցախի իշխանությունների անունից դատապարտել նրա պահվածքը։
«Իշխանական պատգամավորը ոչ միայն սեփական թյուր կարծիքն է արտահայտել Արցախի ժողովրդի պայքարի վերաբերյալ, այլև արդարացրել է ՀՀ ԱԺ նախագահ Ալեն Սիմոնյանի կողմից նախկինում արված հայտարարությունը, թե արցախցիները պետք է մնային և կռվեին: Այս հայտարարությամբ Սուքիասյանը հերթական հոգեբանական ահաբեկչությանն է ենթարկել 2023 թվականի սեպտեմբերին ադրբեջանական ագրեսիան հերոսաբար դիմակայած զինծառայողներին և կամավորներին, զոհվածների, անհետ կորածների և գերեվարվածների հարազատներին»,- ասված է հայտարարության մեջ։
Արցախի տեղեկատվական շտաբը նշել է, որ որ 2023-ի սեպտեմբերի 19-ին Ադրբեջանի կողմից Արցախի նկատմամբ սանձազերծված ռազմական գործողությունների ընթացքում զոհվել է 265 զինծառայող։
«Արցախի իշխանությունները խիստ դատապարտում են Սուքիասյանի անպատասխանատու պահվածքը, որը պարունակում է արցախցիների նկատմամբ ատելության, ներազգային պառակտման տարրեր»,- հավելել են շտաբում։
Ապրիլի 17-ին պատգամավորն ասել էր, որ «2023-ին զոհվել է 10 ղարաբաղցի», և որ «Սիմոնյանը ճիշտ էր ասում՝ թող մնային ու կռվեին»։ Նույն օրը Սուքիասյանը ներողություն էր խնդրել ադրբեջանական ագրեսիայի հետևանքով զոհերի «սխալ թիվ ասելու համար»՝ նշելով, որ «210 զոհի փոխարեն ասել է 10 զոհ»։
Ադրբեջանի ռազմական ագրեսիայի հետևանքով, ՀՀ ՔԿ-ի վերջին տվյալներով, զոհվել էր ավելի քան 200, վիրավորվել՝ ավելի քան 300 մարդ, գերեվարվել՝ 16-ը, խոշտանգվել՝ 14-ը, անհետ կորել՝ 42-ը։ Սեպտեմբերի 25-ին Ստեփանակերտի մոտ գտնվող բենզինի պահեստի պայթյունի հետևանքով կա 218 զոհ, 21 անհետ կորած, 3 չնույնականացված դի և 120 վիրավոր։
