Գյումրու քաղաքապետի թեկնածու Վարդան Ղուկասյանը պատրաստակամություն է հայտնել ըննդիմադիր ուժերի աջակցությամբ, «հին եռանդով», ստանձնել քաղաքապետի պաշտոնը և իր «ճոխ նախընտրական ծրագրերը» կյանքի կոչել։ Այդ մասին ասվում է Ղուկասյանի գրասենյակի տարածած հայտարարության մեջ։
Նա շնորհակալություն է հայտնել ընդդիմադիր երեք ուժերին՝ «իրենց ընտրողների պատվիրակած բաժին իշխանությունը Ղուկասյանի փորձառու գործադրմանը վստահելու համար»։
Նշվում է, որ Ղուկասյանն առաջադրման օրից ի վեր «քաջ գիտակցել է իր հանձնառության ծանրությունը»։
Գրասենյակից կոչ են արել Ղուկասյանի բանտարկության մասին կանխատեսումներ չանել, քանի որ «ներկա իշխանությունների կառավարման ներքո Հայաստանում յուրաքանչյուր քաղաքացի կարող է բանտարկվել կամայական պահի»։
«Որոշ շերտերի կոչ ենք անում նաև զերծ մնալ նրա ապագա կառավարման «լուծը կիսելու» կամ նրա բանտարկման ռիսկերը որպես նոր և բացարձակ կանխատեսումներ ներկայացնելուց՝ այդ ամենը որպես խոցելիություն որակելով»,- ասվում է հայտարարության մեջ։
«Իմ հզոր համայնք» կուսակցության և «Մայր Հայաստան» դաշինքի ներկայացուցիչները մարտի 31-ին հայտարարել էին իրենց ձայները Ղուկասյանին տալու որոշման մասին, ինչի արդյունքում իշխող «Քաղաքացիական պայմանագիրը» կզրկվի առաջատարի դիրքերից։ Ապրիլի 4-ին «Մեր քաղաքը» դաշինքի թեկնածու Մարտուն Գրիգորյանը հայտնել էր, որ պատրաստ է Կոմունիստական կուսակցության թեկնածու Ղուկասյանին անհրաժեշտ քվե տալ։
Մարտի 30-ին տեղի ունեցած ՏԻՄ ընտրությունների տվյալներով՝ թեպետ Գյումրիում ՔՊ-ն առաջատար է, սակայն 50+ ձայներ չի հավաքել։
Գյումրիում 82 ընտրական տեղամասի արդյունքներով՝ ՔՊ-ն և ՔՊ-ի քաղաքապետի թեկնածու Սարիկ Մինասյանը հավաքել էին 17 183 ձայն։ Երկրորդ տեղում Ղուկասյանն էր՝ 9727 ձայնով։ Երրորդ տեղում Գրիգորյանը՝ 7380 ձայնով, չորրորդում՝ Մխիթարյանը՝ 3734 ձայնով։ Առաջատարների հնգյակը 2902 ձայնով եզրափակում էր Սիմոնյանը։
