ՊՆ-ում մարտի 8-ին պարգևավճարներ չեն տվել կանանց՝ տնտեսելով զենք գնելու գումար, գրել է «Հրապարակ»-ը՝ հղում անելոով ՊՆ-ում իր աղբյուրին։
Ըստ նրա՝ ՊՆ-ի զինվորական և քաղծառայող կանայք վիրավորված են վերադասի վերաբերմունքից, քանի որ նախարարության կազմավորումից ի վեր՝ կանանց միամսյակի առիթով պարգևավճարներ են ստացել։
«Մեծ գումար չէր՝ պահումներով շուրջ 38 հազար դրամ էինք ստանում, բայց մեզ գնահատված ու արժևորված էինք զգում»,- թերթին պատմել է կին զինծառայողը։
Թերթի աղբյուրի խոսքով՝ տրանսպորտի կրճատումը նույնպես ազդել է իրենց վրա, քանի որ ՊՆ աշխատակազմին սպասարկող ավտոբուսների կրճատումից հետո գերատեսչության աշխատակիցները մնացել են «հանրային տրանսպորտի հույսին»։
«Յուրաքանչյուրս ամսական 10-13 հազար դրամ ենք հավաքում, տալիս ենք ավտոբուսի վարորդին, որ ժամանակին գործի հասցնի։ Իսկ տղամարդիկ իրենց մեքենաներով են, նրանք միշտ շահեկան վիճակում են»,- նշել է նա։
Դեկտեմբերին մամուլը գրել էր, որ ծառայողական մեքենաների թիվը կրճատելու ծրագրերի մասին ՀՀ վարչապետ Նիկոլ Փաշինյանի հայտարարությունից հետո մի շարք պաշտոնյաների զգուշացրել են, որ ստիպված են լինելու ոտքով աշխատանքի գնալ։
