«Դեմոկրատական այլընտրանք» կուսակցության ցուցակը գլխավորող անկուսակցական Արտյոմ Ղարաղազարյանը Թուրքիայում կացության քարտ ունի, հայտնել է «Հրապարակ»-ը՝ հղում անելով իր աղբյուրներին։
Այս մասին երեկ՝ մարտի 24-ին, հայտարարել էր ՔՊ թեկնածու Սարիկ Մինասյանը։ «Գյումրու 9 ուժերից մեկի 1-ին համարը Թուրքիայի կացության քարտ ունի, էդքան տղա է, թող ասի այդ մասին»,- հայտարարել էր նա։
Թերթը նշել է, որ Ղարաղազարյանը Թուրքիայում հյուրատներ ունի և պարբերաբար այցելում է։ Կուսակցության ղեկավար Սուրեն Սուրենյանցը թերթին չի հերքել տեղեկությունը, սակայն խոստացել է պատասխանել, երբ զրուցի իրենց թեկնածուի հետ։
Ավելի ուշ նա հայտարարել է, որ այսօր՝ մարտի 25-ին, ասուլիս կհրավիրեն և կպատասխանեն Մինասյանի բացահայտմանը։
Հունվարի 20-ին հաստատվել էր Գյումրիում արտահերթ ընտրությունների նախապատրաստման և անցկացման հիմնական միջոցառումների ժամանակացույցը։
Փետրվարի 11-ին ռեժիսոր և պրոդյուսեր Ռուբեն Մխիթարյանը հայտարարել էր Գյումրու քաղաքապետի ընտրություններում առաջադրվելու իր որոշման մասին։ Փետրվարի 12-ին «Պատիվ ունեմ» խմբակցության անկուսակցական պատգամավոր Մարտուն Գրիգորյանն իր թեկնածությունն էր առաջադրել Գյումրու քաղաքապետի պաշտոնում։
2024 թվականի նոյեմբերի 26-ին Փաշինյանը հայտարարել էր Գյումրիի քաղաքապետի պաշտոնակատարի թեկնածուին որոշելու համար նախնական ընտրություն անցկացնելու մասին։ Դեկտեմբերի 13-ին Փաշինյանը Սարիկ Մինասյանին Գյումրիի ղեկավարի պաշտոնակատար էր նշանակել։ Գյումրիի քաղաքապետ Վարդգես Սամսոնյանը 2024 թվականի հոկտեմբերի 28-ին հրաժարական էր տվել։ Միաժամանակ՝ հրաժարական էին տվել նաև «Բալասանյան» դաշինքի ավագանու անդամները։
