ՀՀ ԱԺ «Պատիվ ունեմ» խմբակցությունը չի մասնակցի խմբակցության պատգամավոր, Հայաստանի «Հանրապետական» կուսակցության Գործադիր մարմնի անդամ Տարոն Մարգարյանին անձեռնմխելիությունից զրկելու հարցով ԱԺ նիստին, հայտարարել է խմբակցությունը։
«ՀՀ ԱԺ առաջիկա նիստերին օրվա կառավարիչների կողմից Մարգարյանի դեմ շուրջ յոթ տարի շարունակվող քաղաքական հետապնդման հերթական բեմադրված ներկայացմանը ֆրակցիան չի մասնակցելու»,- ասվում է հայտարարության մեջ։
Ըստ ArmLur.am-ի՝ Ազգային ժողովի պատգամավոր Հովիկ Աղազարյանի նկատմամբ քրեական հետապնդում հարուցելու համաձայնություն տալու մասին հարցի քննարկումը տեղի կունենա մարտի 26-ի նիստում, որի ավարտից անմիջապես հետո կսկսվի Մարգարյանի հարցի քննարկումը։
Մարտի 12-ին ՀՀ գլխավոր դատախազ Աննա Վարդապետյանը դիմել էր Հայաստանի խորհրդարան՝ Աղազարյանին, ինչպես նաև Մարգարյանին անձեռնմխելիությունից զրկելու խնդրանքով։ Տեղեկությունն Armenia Today-ին հաստատել էր Դատախազության մամուլի ծառայությունը։
Աղազարյանի և Մարգարյանի նկատմամբ քրեական հետապնդում հարուցելու և նրանց անձեռնմխելիությունից զրկելու վերաբերյալ Ազգային ժողովի համաձայնության մասին որոշման նախագծերը հրապարակվել էին ԱԺ-ի պաշտոնական կայքում, սակայն հաջորդ նստաշրջանի օրակարգ չէին ընդգրկվել։ Երկու պատգամավորի գործն էլ վերաբերում է կոռուպցիոն գործարքներին։
