Մոսկվա մեկնող ութ չվերթ ուղղվել է Կազանի պահեստային օդանավակայան, հայտնել է Թաթարստանի մայրաքաղաքի օդանավակայանի մամուլի ծառայությունը։
«Մարտի 11-ին՝ ժամը 5:20-ից 8:50-ն ընկած ժամանակահատվածում Երևանից, Բաքվից, Օշից, Կուլյաբից, ինչպես նաև Նովոկուզնեցկից և 3 ինքնաթիռ Օմսկից ժամանել են Կազանի այլընտրանքային օդանավակայան»,- ասվում է հաղորդագրության մեջ։
Այլընտրանքային օդանավակայան մեկնելու պատճառը Մոսկվայի ավիահանգույցի օդանավակայաններում ժամանակավոր սահմանափակումներն են։
ՌԴ հակաօդային պաշտպանության ուժերը գիշերը ռուսական տարածքի վրա ոչնչացրել էին ուկրաինական 337 անօդաչու թռչող սարք։ Դեպքի առթիվ Քննչական կոմիտեն քրեական գործ էր հարուցել։ Անօդաչու թռչող սարքի հարձակման հետևանքով զոհերի թիվը հասել էր երեքի։
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի միջև փետրվարի 12-ին կայացած հեռախոսազրույցից հետո։ Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Փետրվարի 18-ին ԶԼՄ-ները հայտնել էին, որ ԱՄՆ-ն ցանկանում է գրեթե լիակատար վերահսկողություն ունենալ ուկրաինական ռեսուրսների և դրանցից ստացված եկամուտների կեսի վրա։
Փետրվարի 28-ին Ուկրաինայի նախագահ Վլադիմիր Զելենսկին ժամանել էր Վաշինգտոն՝ հանքարդյունաբերության գործարք կնքելու համար։ Նրա հանդիպումը Թրամփի հետ վերածվել էր վիճաբանության՝ հենց լրատվամիջոցների առջև, և գործարքը ձախողվել էր:
