Շվեյցարիայի հայկական միությունների խորհուրդը (CAAS) մտահոգություն է հայտնել Ցյուրիխում հայ համայնքի հետ հանդիպման ժամանակ ՀՀ վարչապետ Նիկոլ Փաշինյանի՝ Հայոց ցեղասպանությանն առնչվող վերջին հայտարարությունների կապակցությամբ։ Հայտարարության տեքստը հրապարակվել է խորհրդի կայքում։
Ըստ խորհրդի՝ Փաշինյանի խոսքերը խարխլում են Հայոց ցեղասպանության հիշողությունը և կասկածի տակ են դնում Հայաստանի կառավարության հանձնառությունն այս հանցագործության միջազգային ճանաչման հարցում։
CAAS-ն ընդգծել է, որ Հայոց ցեղասպանության ճանաչումը հիմնված է անվիճելի պատմական փաստերի վրա և արդարության համար մղվող պայքարի անբաժանելի մաս է հանդիսանում։ Խորհուրդը հիշեցրել է, որ այս ողբերգության ճանաչումը ձեռք է բերվել Սփյուռքի, միջազգային հետազոտողների և պետությունների, այդ թվում՝ Շվեյցարիայի և Հայաստանի ջանքերով։
Խորհուրդը վարչապետին կոչ է արել պարզաբանել իր հայտարարությունները և վերահաստատել հավատարմությունը Հայոց ցեղասպանության միջազգային ճանաչման հարցում։ CAAS-ը վստահեցրել է, որ պատմական արդարության համար պայքարը շարունակվելու է՝ անկախ քաղաքական հանգամանքներից։
Շվեյցարիայի հայ համայնքի ներկայացուցիչների հետ հանդիպմանը Փաշինյանը, պատասխանելով Հայոց ցեղասպանության մասին հարցին, ասել էր, որ «պետք է հասկանալ՝ ի՞նչ է տեղի ունեցել և ինչո՞ւ է, ինչպե՞ս ենք մենք դա ընկալել, ո՞ւմ միջոցով ենք ընկալել»։ Նա հավելել էր՝ «ինչպե՞ս է, որ 1939 թվին Հայոց ցեղասպանության օրակարգ չկար և ինչպե՞ս է, որ 1950 թվին Հայոց ցեղասպանության օրակարգ է հայտնվել»։ Նա հայտարարել էր Հայոց ցեղասպանության պատմությանը «վերադառնալու» անհրաժեշտության մասին։
