Կանադան քննարկել է Լեռնային Ղարաբաղում ագրեսիայի համար Ադրբեջանի դեմ պատժամիջոցներ սահմանելու հարցը, հաղորդում է Կանադական հեռարձակման ընկերությունը (CBC):
«Կանադան և նրա դաշնակիցները քննարկել են Ադրբեջանի դեմ պատժամիջոցներ սահմանելու հարցը՝ նախորդ ամիս Լեռնային Ղարաբաղ ռազմական ներխուժման համար, որը հարուցել է ավելի քան 100,000 էթնիկ հայերի զանգվածային արտագաղթը դեպի հարևան Հայաստան»,- գրում է CBC News-ը՝ վկայակոչելով Կանադայի արտաքին հարաբերությունների և միջազգային զարգացման կոմիտեին:
CBC-ն նաև հայտնել է Հայաստանում Կանադայի դեսպան Էնդրյու Թերների նախազգուշացումը հայ-ադրբեջանական բանակցային գործընթացի համար Բաքվի դեմ պատժամիջոցների վտանգի առնչությամբ: «Այժմ պատժամիջոցների կիրառումը կարող է խաթարել շարունակվող խաղաղության ջանքերը», – ասել է նա՝ ելույթ ունենալով Երևանից հեռուստատեսային կոնֆերանսի ժամանակ:
Թերները հիշեցրել է Հայաստանին ռազմական աջակցության մասին Ֆրանսիայի հայտարարությունները, որոնք «ստիպել են Ադրբեջանին հրաժարվել պլանավորված միջազգային հանդիպումներից և քննարկումներից, որոնք կարող են նպաստել խաղաղության հաստատմանը»: Դեսպանի խոսքով՝ ներկայումս քննարկումներ են ընթանում պատժամիջոցների գործիքների կիրառման համապատասխան ժամանակի շուրջ։ Նա նաև ընդգծել է Օտտավայի կոչը Բաքվին՝ երաշխավորելու Ղարաբաղը լքած հայերի վերադարձի իրավունքը։
CBC-ն գրել է նաև փորձագետների մասին, ովքեր համաձայն չեն Բաքվի դեմ կանադական պատժամիջոցների բացասական հետևանքների վերաբերյալ Թերների հայտարարություններին։
«Դրանք (պատժամիջոցները – խմբ.) նախազգուշացում կլինեն այն մասին, որ Կանադան ակնկալում է Ադրբեջանից պաշտպանել մշակութային ժառանգությունը, պաշտպանել մնացած մի քանի էթնիկ հայերին, պահպանել տեղահանվածների վերադարձի իրավունքը և ապահովել ահաբեկիչների անվան տակ [ադրբեջանական] ռեժիմի կողմից ձերբակալված քաղաքացիական առաջնորդների նկատմամբ արդար վերաբերմունք»,- ասել է Վինձորի համալսարանի իրավագիտության պրոֆեսոր Քրիստոֆեր Ուոթերսը:
Փորձագետը հիշեցրել է Կանադայի կառավարության կողմից Թուրքիային անօդաչու թռչող սարքերի մասերի վաճառքը, որոնք օգտագործվել է Ադրբեջանի կողմից 2020 թվականին Հայաստանի դեմ պատերազմում։ Ուոթերսը նաև մատնանշել է Ադրբեջանի կողմից Հայաստանի ինքնիշխան տարածքի որոշ հատվածների զավթումը և Ադրբեջանի կառավարության հռետորաբանությունը, որը պահանջում է «հերթական հողակտոր Հայաստանի ներսում»:
Օտտավայի համալսարանի Կովկասի քաղաքականության փորձագետ Ժան-Ֆրանսուա Ռատելը Կանադայի կառավարությանը կոչ է արել աջակցել Հայաստանի կողմից ՄՔԴ-ի կանոնադրության վավերացմանը, քանի որ դա կհանգեցնի Լեռնային Ղարաբաղում «ենթադրյալ էթնիկ զտումների» հետաքննությանը:
Քվեբեկի պատգամավոր Ստեֆան Բերգերոնը CBC-ին ասել է, որ Ադրբեջանը կարող է համարձակություն զգա ևս մեկ հարձակում իրականացնելու համար՝ իր վերջին ռազմական հաջողությունների պատճառով:
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Սեպտեմբերի 28-ին Արցախի նախագահ Սամվել Շահրամանյանն ԱՀ պետական համակարգը լուծարելու հրամանագիր էր ստորագրել, համաձայն որի՝ 2024-ի հունվարի 1-ից Արցախի Հանրապետությունը կդադարի գոյություն ունենալ։ ԼՂ-ից բռնի տեղահանված անձնաց թիվը կազմում է 100․632։ Համաձայն ՀՀ ՔԿ վերջին տվյալների՝ Արցախի դեմ ադրբեջանական ագրեսիայի հետևանքով զոհվել է ավելի քան 200, վիրավորվել՝ ավելի քան 300 մարդ, գերեվարվել են 16-ը, խոշտանգվել՝ 14-ը, անհետ կորել՝ 42-ը։
