Հայաստանում կանցկացվի ՓԾ լայնամասշտաբ հրամանաշտաբային ուսումնավարժություն

Հոկտեմբերի 9-11-ը Հայաստանում կանցկացվի «Երկրաշարժի համակողմանի կառավարումը ՀԿ խոցելի տարածքներում արդյունավետ պլանավորման, արձագանքման և համատեղ գործողությունների միջոցով» թեմայով HOPE 22-23 լայնամասշտաբ հրամանաշտաբային ուսումնավարժությունը, մամուլի ասուլիսի ժամանակ հայտարարեցին կազմակերպիչները։ Վարժանքի նպատակը Հայաստանի ու գործընկեր պետությունների՝ Ֆրանսիայի, Հյուսիսային Մակեդոնիայի, Մենտենեգրոյի, Վրաստանի, Կիպրոսի և Հունաստանի փրկարարական խմբերի պատրաստվածության բարձրացումն է։

Ծրագրի հայաստանյան համակարգող, ՓԾ գնդապետ Արմինե Հայրապետյանի խոսքով՝ աշխատանքներն իրականանալու են 36-ժամյա դաշտային վարժանքի ձևաչափով։

«Վարժանքի ընթացքում տարվող աշխատանքներն ունենալու են որոնողափրկարարական բնույթ, ինչպես նաև հանրային իրազեկման, մշակույթային հուշարձանների՝ երկրաշարժից տուժելու ժամանակ իրականացվելիք գործողություններ՝ սիմուլիացիայի եղանակով»,- ասաց նա։

Կազմակերպիչները նշեցին, որ մոտ 24 ամիս տևողությամբ նախորդող աշխատանքներ են իրականացվել։ Ըստ ՓԾ վարչության պետ Արմեն Գևորգյանի՝ Լուսակերտում համապատասխան վրանային ավան է ծավալվել, որտեղ ներկայացվել են 2 թիմեր, իսկ օրվա ընթացքում կներկայանան բոլոր 6 թիմերը, ինչպես նաև հայաստանյան թիմը։ 

«Թիմերն աշպատելու են Չարենցավան, Աբովյան քաղաքներում, Արզնիի ձորի որոշ հատվածներում։ Մենք որոշել ենք վարժանքը մի փոքր ավելի իրատեսական դարձնել։ Փլատակները, որոնք առաջանում են երկրաշարժի ժամանակ, նմանատիպ փլատակներ են ստեղծվել։ Բավականին բարդ տեղամասեր ունենք, որ ներկայացող թիմերն ամբողջ ծավալով պետք է աշխատեն, որպեսզի կարողանան աշխատաններն իրականացնել ամբողջ ծավալով»,- ասաց Գևորգյանը՝ հավելելով, որ թիմերը տեղեկություն չունեն, թե որտեղ են աշխատելու և ինչ պայմաններում, ինչ դժվարությունների է հանդիպելու, ինչ արգելքներ հաղթահարելու։

Կիպրոսի Եվրոպական համալսարանի ներկայացուցիչներ, ծրագրի ղեկավար Եվանգելոս Կատսարոսի խոսքով՝ կարևոր է ոչ միայն վարժանքերի անցկացումն, այլև դրանցից հետո միասնաբար համագործակցությամբ աշխատելը։

«Շատ կարևոր է վարժաների արդյունքները վերլուծելը և դրանից դասեր քաղելը։ Նպատակն այն է, որ հայ հասարակությանը ցույց տան, որ իրենք կարող են համակարգված աշխատել ցանկացած տեսակի աղետների դեպքում»,- ասաց Կատսարոսը։

Գնահատողների թիմի ղեկավար Խրիստոս Դիմոպուլոսի խոսքով՝ արդյունքները կներկայացվեն ոչ թե սովորական, այլ գիտական ճանապարհով, որոնք հասանելի կլինեն բոլորին։

«Ծրագիրն իրենից ներկայացնում է բարդ և համալիր ծրագիր․ շնորհակալություն եմ հայտնում հայկական կողմին, որ պատրաստակամ է այսպիսի բարդ մակարդակի ծրագիր ներկայացնել։ Իրականում շատ եվրոպական երկրներ, որոնք ունեն շատ ավելի լայն հնարավորություններ, շատ հաճախ բախվում են խնդիրների»,- ասաց Դիմոպուլոսը։