Կառավարությունն իր 808-Ն որոշմամբ խստացրել է ՀՀ տարածքով երկակի նշանակության ապրանքների արտահանման, տարանցիկ փոխադրման կարգը, ավելի ճիշտ` գործնականում արգելել է դրանք արտահանել ՌԴ, հայտնել է «Հրապարակ»-ը:
Այդպիսի ապրանքները, որոնք, արևմտյան կառույցների կարծիքով, կարող են փոփոխությունների ենթարկվել եւ օգտագործվել ռուսական ռազմարդյունաբերության մեջ, մեծ քանակությամբ Հայաստանից տարվում էին Ռուսաստան, եւ Արեւմուտքը որոշել է արգելել դա:
Խոսքն այն ապրանքների մասին է, ինչպիսիք են, օրինակ, հաշվողական մեքենաներն ու տվյալների մշակման բլոկները, մեքենաները և կիսահաղորդչային սարքերի կամ էլեկտրոնային ինտեգրալային սխեմաների արտադրության համար ապարատուրան, տրանսֆորմատորները, ստատիկ էլեկտրական կերպափոխիչները, ինդուկտիվության կոճերը եւ դրոսելները, բազային կայանները եւ այլն։ Նման արտադրատեսակները փոքր փոփոխությունների ենթարկվելուց հետո կարող են օգտագործվել ռազմարդյունաբերության մեջ, ուստի դրանց արտահանումն ու տարանցումը ՀՀ տարածքով հատուկ վերահսկվում է։
Եվ այդ արգելքը դրվել է ոչ թե ՊԵԿ-ի կամ էկոնոմիկայի նախարարության կողմից, այլ Արայիկ Հարությունյանի հրահանգով։ Սրա արդյունքում տուժում են Հայաստանի Հանրապետության գործարարները, որոնք նշված ապրանքները վերջին մեկ տարում արտահանել են Ռուսաստան` ե՛ւ իրենք են շահույթ ստացել, ե՛ւ պետբյուջե են մեծ գումարների հարկ վճարել: Եվ հիմա ահռելի քանակությամբ ապրանք են բերել ու չգիտեն, թե ինչ անեն դրանց հետ։ Ըստ էության, նրանք կանգնած են սնանկացման վտանգի առաջ, հայտնել է թերթը:
