Ադրբեջանը Հայաստանի ԱԳ նախարար Արարատ Միրզոյանին «ընթացիկ իրողությունները կեղծելու փորձի մեջ» է մեղադրել: Ադրբեջանի ԱԳՆ-ն դատապարտել է Լաչինի միջանցքում Բաքվի կողմից ապօրինի անցակետ ստեղծելու մասին Միրզոյանի խոսքերը, որը նա հնչեցրել է Մեծ Բրիտանիայի եվրոպական հարցերի նախարար Լեո Դոքերթիի հետ համատեղ մամուլի ասուլիսի ժամանակ:
Բաքուն Հայաստանին մեղադրել է նաև «Լեռնային Ղարաբաղ միջազգային առաքելություն ուղարկելը խրախուսելու և Լեռնային Ղարաբաղի հայ բնակչության հետ Ադրբեջանի կառավարության երկխոսությունը խոչընդոտելու մեջ»:
«Մենք դա համարում ենք միջամտություն՝ Ադրբեջանի ներքին գործերին»,–ընդգծել են Ադրբեջանի ԱԳՆ-ում։
Միրզոյանը Երևանում Դոչերտիի հետ համատեղ մամուլի ասուլիսում հայտարարել է, որ Լաչինի միջանցքի արգելափակումը հանգեցրել է Լեռնային Ղարաբաղում հումանիտար ճգնաժամի։
«Ես գործընկերոջս պատմեցի Հայաստանի և Ադրբեջանի միջև հարաբերությունների կարգավորման մասին՝ նշելով, որ դրա հետ մեկտեղ Բաքուն շարունակում է Լաչինի միջանցքի ապօրինի շրջափակումը»,-ասել է Հայաստանի արտգործնախարարը: Նրա խոսքով՝ Բաքվի գործողությունները Լեռնային Ղարաբաղում էթնիկ զտումներ իրականացնելու քաղաքականության մի մասն են: Միրզոյանն ընդգծել է նաև Լեռնային Ղարաբաղ և Լաչինի միջանցք միջազգային փաստահավաք առաքելության ուղարկման կարևորությունը ։
