Հայաստանը պատրաստ է հենց վաղն էլ Թուրքիայի հետ բաց սահմաններ և դիվանագիտական հարաբերություններ ունենալ։ Եթե Հայաստանը պատրաստ է դրան, նշանակում է՝ դրա իրագործումը պատրաստ է Թուրքիայի քաղաքական կամքից։ Այս մասին այսօր «Ազատության» եթերում հայտարարել է Թուրքիայի հետ հարաբերությունների կարգավորման հատուկ բանագնաց, ՀՀ ԱԺ փոխխոսնակ Ռուբեն Ռուբինյանը։
Նա դրական է գնահատել վերջին հանդիպմանը ձեռք բերված պայմանավորվածությունները՝ կապված երրորդ երկրների քաղաքացիների համար ցամաքային սահմանը հատելու հնարավորության և օդային բեռնափոխադրումներ իրականացնելու հետ։
«Սակայն ամենակարևոր բաներից մեկը առաջին պայմանավորվածությունները արագ իրագործելն է։ Ես հույս ունեմ, որ շատ արագ այդ պայմանավորվածությունները կիրագործվեն։ Տրամաբանական կլինի, որ դա տեղի ունենա առաջիկա ամիսներին»,- ասաց նա։
Անդրադառնալով երեկ տեղի ունեցած Փաշինյան-Էրդողան հեռախոսազրույցին՝ նա նշել է, որ այն չի կազմակերպվել միջնորդի միջոցով։ Ռուբինյանը շեշտել է նաև, որ այս պահին Փաշինյան-Էրդողան հանդիպման վերաբերյալ պայմանավորվածություն չկա։
Հիշեցնենք, որ Հայաստանի և Թուրքիայի միջև հարաբերությունների կարգավորման գործընթացի շրջանակներում պարբերաբար հանդիպումներ են տեղի ունենում հատուկ ներկայացուցիչներ Հայաստանի Ազգային ժողովի նախագահի տեղակալ Ռուբեն Ռուբինյանի և դեսպան Սերդար Քըլըչի միջև։ Նրանց 4-րդ հանդիպումն անցկացվել է Վիեննայում։
