Մինչև երեկ լուսաբանման հետ կապված միայն մեկ բողոք ենք ստացել «Հայ ազգային կոնգրես» կուսակցությունից՝ Հանրային հեռուստաընկերության եթերում հարցազրույցի մի հատվածի մոնտաժման վերաբերյալ, հայտնել է ԿԸՀ նախագահ Վահագն Հովակիմյանը։
Նա նշել է, որ պարզաբանում են պահանջելու, որովհետև քարոզարշավի փուլում թեկնածուների խոսքը չպետք է մոնտաժված լինի։ Հովակիմյանի խոսքով՝ անցած տարի Շիրակի ավագանու ընտրությունների ժամանակ շատ լրատվամիջոցներ զանգվածաբար խախտել էին օրենքի պահանջները «լռության» և ընտրությունների օրերին։ Նա նշել է, որ այս անգամ Կենտրոնական ընտրական հանձնաժողովը մտադիր է օգտագործել մոնիթորինգի գործիքներ՝ խախտումները հայտնաբերելու համար։
«Եթե լրատվամիջոցը չի հարգում ՀՀ օրենսդրությունը, թող փակի խմբագրությունը և գնա ուրիշ գործով զբաղվի»,- հայտարարել է ԿԸՀ ղեկավարը։
Հովակիմյանը մանրամասնել է, որ տուգանքը կարող է կազմել մոտավորապես 300 000 դրամ։ Սակայն նա ընդունել է, որ անհատների գործողությունների մոնիթորինգն ավելի դժվար կլինի, քան լրատվամիջոցների աշխատանքինը։
ԿԸՀ ղեկավարը նաև քննադատել է որոշ լրագրողների՝ իր խոսքով՝ քաղաքական դրդապատճառներով ընտրությունների լուսաբանման և ընտրատեղամասերում բախումներ հրահրելու համար։ Նա կարծում է, որ որոշ լրատվամիջոցների ներկայացուցիչներ, իրականում, լրագրության քողի տակ զբաղվում են քաղաքական ներքին կռիվներով։
«Թող այդ օրը ՀՀ քաղաքացին հանգիստ ընտրություն կատարի, թող դադարեն այդ օրը կրքեր բորբոքել, մարդկանց նյարդերի վրա ազդել»,- նշել է Հովակիմյանը։
Նա շեշտել է, որ ընտրարշավների ընթացքում լարված մթնոլորտը բնական է ժողովրդավարական երկրների համար։ Նաև պարզաբանել է, որ խոսքի ազատությունը նույնպես բացասական հետևանքներ ունի, սակայն քարոզարշավի բովանդակությունը սահմանափակելու փորձերը կարող են հանգեցնել գրաքննության։
ԿԸՀ նախագահը մեկնաբանել է նաև արհեստական բանականության օգտագործումն ընտրարշավներում։ Նա նշել է, որ եթե նյութերը չեն պարունակում բռնության կոչեր, զրպարտություն կամ վիրավորանք, ապա հնարավոր ապատեղեկատվությունը պետք է լուծվի հերքման միջոցով կամ դատարանում։
Հունիսի 7-ին Հայաստանում կկայանան խորհրդարանական ընտրություններ, որոնցում կպայքարի 18 քաղաքական ուժ (16 կուսակցություն և 2 դաշինք)։ Քվեարկելու իրավունք կունենա 2 482 872 քաղաքացի, որոնք, ըստ Միգրացիոն ծառայության տվյալների, ընդգրկված են ընտրողների գրանցամատյանում։
