ՀՀ վարչապետ Նիկոլ Փաշինյանը հայտարարել է, որ քննարկվում է հայ-իրանական ու հայ-թուրքական սահմանի պաշտպանության գործառույթների վերանայման հարցը՝ ՌԴ-ի հետ 1990-ականներին կնքված պայմանագրի համաձայն։
Նրա խոսքով՝ Հայաստանը, սեփական սահմանապահ ծառայության կարողությունները զարգացնելուն զուգահեռ` աշխատավարձ է վճարում նաև ռուս սահմանապահներին։ Վարչապետը նշել է, որ ռուսական կողմը բարձրացրել է վճարների ավելացման հարցը, սակայն ՀՀ կառավարության համոզմամբ՝ այդ միջոցները նպատակահարմար է ուղղել հայկական սահմանապահ ուժերի հզորացմանը։
«Ռուս սահմանապահներին վճարումներ ենք կատարում սահմանը պահելու համար։ Նախկինում ևս ռուսաստանցի գործընկերները բարձրացրել են այդ գումարներն ավելացնելու հարցը, քանի որ դրանք չեն բավականացնում ծառայությունների մատուցման համար»,- ասել է վարչապետը։
Նա հավելել է, որ նախատեսվում է սահմանի պաշտպանության ձևաչափի աստիճանական փոփոխություն։ Հայաստանն աստիճանաբար կստանձնի սահմանային վերահսկողության լրացուցիչ պարտականությունները, իսկ Ռուսաստանի ներգրավվածությունը կսահմանափակվի ՀՀ-ի համար ֆինանսապես հարմար պայմաններով։
2025 թվականի ապրիլին Փաշինյանը հայտարարել էր, որ Հայաստանը կարող է փուլ-փուլ վստահորեն ստանձնել սեփական սահմանների պահպանությունը։
ՀՀ վարչապետը և ՌԴ նախագահ Վլադիմիր Պուտինը հոկտեմբերի 8-ին Մոսկվայում կայացած հանդիպման ժամանակ պայմանավորվել էին, որ 2025-ի հունվարի 1-ից Հայաստան-Իրան պետական սահմանի հսկիչ-սահմանային կետում ծառայությունն ամբողջությամբ կիրականացնեն ՀՀ ԱԱԾ սահմանապահ զորքերը։ Պայմանավորվածություն էր ձեռք բերվել նաև, որ Հայաստան-Իրան և Հայաստան-Թուրքիա պետական սահմանի պահպանությանը կմասնակցեն նաև ՀՀ ԱԱԾ սահմանապահ զորքերը։
Նախքան այդ՝ հուլիսի 31-ին, ռուս սահմանապահները 32 տարվա ծառայությունից հետո ավարտել էին իրենց ծառայությունը Երևանի «Զվարթնոց» օդանավակայանում։
