Արմավիրի մարզի Մեծամոր համայնքի Տարոնիկ գյուղի հինգ փողոցների և մեկ նրբանցքի (մոտ 2 կմ ընդհանուր երկարությամբ) հիմնանորոգումը նախատեսված է 2026 թվականին, Armenia Today-ի հարցմանն ի պատասխան՝ հայտնել է ՏԿԵ նախարարի տեղակալ Քրիստինե Ղալեչյանը։
Մարտի 18-ին Armenia Today-ի նկարահանող խումբն այցելել էր բնակավայր՝ բնակիչների բողոքի ակցիայից հետո, որոնք դժգոհում էին ճանապարհների անմխիթար վիճակից: Ավելի քան 5600 բնակիչ ունեցող բնակավայրի համար երթուղին մայրուղուն կապող միակ ճանապարհն է։ Ճանապարհահատվածը չունի ասֆալտբետոնե ծածկ, իսկ հարթեցման համար օգտագործվող ավազակոպճային շերտը, բնակիչների պնդմամբ, տեղումների ժամանակ վերածվում է ցեխաշերտի՝ ճանապարհը դարձնելով գրեթե անանցանելի:
Բնակիչների խոսքով՝ ճանապարհի վիճակը պարբերաբար խոչընդոտում է նաև շտապօգնության մեքենաների տեղաշարժին:
Փոխնախարարի հավաստիացմամբ՝ վերանորոգման աշխատանքները կմեկնարկեն սուբվենցիոն ծրագրերի հաստատումից և համապատասխան մրցութային փուլերի ավարտից հետո։
Ի պատասխան բնակիչների պնդումներին, թե բնակավայրում տարիներ շարունակ ներդրումներ չեն կատարվել, ՏԿԵ նախարարությունից ներկայացրել են վիճակագրություն, ըստ որի՝ 2022 թվականից ի վեր Տարոնիկում իրականացվել են 375 մլն դրամի աշխատանքներ, այդ թվում՝ ջրամատակարարման ցանցի կառուցում և գազաֆիկացում:
Ընթացիկ միջոցառումներ
Գերատեսչությունից հայտնում են նաև, որ ամենամյա հարթեցման աշխատանքներն այս տարի դեռևս չեն մեկնարկել՝ մրցութային գործընթացի պատճառով: Ֆինանսական հատկացումների հստակ չափը հայտնի կդառնա գնահատման ավարտից և մրցույթի հայտարարումից հետո:
Միևնույն ժամանակ, իրականացվում է Վաղարշապատ-Արտիմետ-Խորոնք-Առատաշեն-Տարոնիկ ճանապարհի առանձին հատվածների հիմնանորոգման նախահաշվային արժեքի գնահատում:
Արաքսյա Սնխչյան
