Վերաքննիչ քրեական դատարանը 44-օրյա պատերազմում զոհված Մխիթար Գալեյանի հորը՝ Գարիկ Գալեյանին, խուլիգանության մեղադրանքով 1,5 տարի ժամկետով ազատազրկելու որոշում է կայացրել, հայտնել է նրա փաստաբան Վահան Հովհաննիսյանը։
Փաստաբանը նշել է, որ քրեակատարողական վարչության տվյալներով՝ խուլիգանության երկրորդ մասի մեղադրանքով ազատազրկման վայրերում պատիժ է կրում 3 անձ, որոնք դատապարտվել են կրկնահանցագործության և այլ ծանր հանցանքների համակցության համար։
«Կարող ենք արձանագրել, որ Գալեյանը կլինի առաջին անձը, որը նման մեղադրանքով ազատազրկման ձևով պատիժ կկրի քրեակատարողական հիմնարկում»,- գրել է նա։
Փաստաբանը հիշեցրել է, որ Գալեյանը մեղադրվում է խուլիգանության համար, որը «դրսևորվել էր անձի վրա խմելու մաքուր ջուր լցնելով»։
«Հիշեցնեմ, որ պետությունը խուլիգանություն չէր համարել Կասկադ համալիրում Ալեն Սիմոնյանի կողմից քաղաքացու աչքին թքելը»,- նշել է փաստաբանը։
2024-ին Գալեյանի դեմ սեպտեմբերի 8-ին քրեական գործ էր հարուցվել նաև թմրամիջոցներ ապօրինի ձեռք բերելու, պահելու և իրացնելու կասկածանքով։ Գալեյանին կալանավորել էին, իսկ 2025-ի հունվարին կիրառել տնային կալանք խափանման միջոցը։
