2024-ի օգոստոսին կալանավորված Արաբկիրի թաղապետ Արամ Ազատյանը վերադարձել է աշխատանքի, Armenia Today-ին հայտնել է Երևանի քաղաքապետի խոսնակ Հայկ Կոստանյանը։
Քաղաքապետի խոսնակը տեղեկացրել է, որ դատարանը վերացրել է Ազատյանի նկատմամբ կիրառած սանկցիաները։
«Քանի որ իր նկատմամբ դատարանի կողմից կիրառված՝ աշխատանքի վերադառնալու հետ կապված սանկցիաներն այլևս չկան, նա վերադարձել է աշխատանքի»,- մանրամասնել է Կոստանյանը։
Նրա խոսքով՝ քանի դեռ դատական գործընթաց էր իրականացվում, Արաբկիրի թաղապետի լիազորությունները ժամանակավորապես կատարում էր թաղապետի տեղակալը, իսկ այժմ պարտականություններն ամբողջությամբ անցել են Ազատյանին։
Հաշվի առնելով և հարգելով անմեղության կանխավարկածը՝ Armenia Today-ը Կոստանյանին հարցրեց՝ քաղաքապետարանում խնդրահարույց չե՞ն համարում, որ պաշտոնեական դիրքի չարաշահման, կաշառք ստանալու համար մեղադրվող պաշտոնյան շարունակելու է նույն պաշտոնը զբաղեցնել։
«Քանի որ դատարանը հանել է մեղադրանքներն իր վրայից, այսինքն՝ իրավական տեսանկունից նա կարող է պաշտոնավարել, այս պահի դրությամբ նա կատարում է իր պարտականությունները։ Հավելյալ այլ բան չեմ կարող ասել, քանի որ հարցն ամբողջությամբ իրավական տիրույթում է լինելու»,- պատասխանել է Կոստանյանը։
2024-ի հուլիսին Քննչական կոմիտեից Armenia Today-ին հայտնել էին, որ ՔԿ-ն խուզարկություններ է կատարել Արաբկիր վարչական շրջանի վարչական շենքում, կան ձերբակալվածներ։ Հուլիսի 4-ին ՔԿ-ից տեղեկացրել էին, որ Արաբկիր վարչական շրջանում չարաշահումների վերաբերյալ քրեական գործի շրջանակներում իրավապահները ձերբակալել են 8 անձի: Ազատյանի նկատմամբ 30 մլն դրամ գրավի դիմաց տնային կալանք էր կիրառվել, մնացածներից ստորագրություն էին վերցրել չհեռանալու մասին։
2024-ի օգոստոսին դատարանը բավարարել էր Ազատյանի խափանման միջոց տնային կալանքը կալանքով փոխարինելու մասին Գլխավոր դատախազության բողոքը։
