«Սրբազան շարժման» առաջնորդ Բագրատ Գալստանյանին տեղափոխել են ԱԱԾ շենքում գտնվող «Երևան-Կենտրոն» քրեակատարողական հիմնարկ, տեղեկությունն Armenia Today-ին հաստատեց նրա փաստաբան Հովհաննես Խուդոյանը հավելելով, որ դեռ չի հանդիպել իր պաշտպանյալին։
«Պետք է դատական ակտն ստանանք, բողոքարկենք և հանդիպենք՝ մեր հետագա ռազմավարությունը քննարկելու նպատակով»,- ասաց Խուդոյանը։
Ավելի ուշ հայտնի դարձավ, որ ընդդիմադիր շարժման մասնակիցներից Մելքոն Թամրազյանը ևս ձերբակալվել է։
Իրավապահներն, ընդհանուր առմամբ, 17 անձի նկատմամբ կալանքի միջնորդություն էին ներկայացրել դատարան։ Նրանցից 15-ի նկատմամբ դատարանը կիրառել էր կալանք՝ երկու ամիս ժամկետով։
Հունիսի 25-ին ԱԱԾ-ն խուզարկություններ էր իրականացրել «Սրբազան պայքար» շարժման աջակիցների բնակարաններում իշխանության զավթման փորձի շուրջ քրեական գործի շրջանակում։ Այն հարուցվել էր Civic.am կայքի հրապարակած փաստաթղթի հիման վրա, որն ըստ կայքի «Հեղաշրջման պլան» էր։ Քննչական կոմիտեն հայտնել էր գործողությունների մասին։
