Դատարանը երկու ամիս ժակետով կալանավորել է արցախցի գործարար Տիգրան Գալստյանին և Հրայր սարկավագին։ Դատարանի որոշման մասին հայտարարել է «Ազգային ճակատ»-ը։
Ավելի ուշ կալանավորվել է ակտիվիստ Արսեն Ղազարյանը։
Հունիսի 26-ի գիշերը դատարանը երկու ամսով կալանավորել էր ընդդիմադիր «Սրբազան պայքար» շարժման առաջնորդ Բագրատ արքեպիսկոպոս Գալստանյանին։ Իսկ դրանից մի քանի ժամ ավելի վաղ կալանավորվել էին Արցախի Հանրապետության ԱԺ պատգամավոր Դավիթ Գալստյանը, «Սրբազան պայքարի» ակտիվիստ Լիդյա Մանթաշյանը, Բագրատ սրբազանի օգնական Մովսես Շարբաթյանը, բլոգեր Արմեն Ալեքսանյանը, պահեստազորի գնդապետ Միհրան Մախսուդյանը, 44-օրյա պատերազմում զոհված հերոս Հակոբ Ռոստոմյանի հայրը՝ Արա Ռոստոմյանը, Աղվան Արշակյանը։ Արշակյանից բացի, նրանց բոլորի նկատմամբ երկամսյա կալանք է կիրառվել:
Հունիսի 25-ին ԱԱԾ-ն խուզարկություններ էր իրականացրել «Սրբազան պայքար» շարժման աջակիցների բնակարաններում: Քննչական կոմիտեն հայտնել էր, որ շարժման աջակիցների տներում քննչական, վարութային գործողություններ իրականացնելու պատճառը «ՀՀ-ում ահաբեկչական և իշխանությունը զավթելուն ուղղված գործողություններ իրականացնելու» ծրագիրն էր, ինչը կանխվել է։ Կոմիտեն ավելի ուշ հրապարակել էր կառավարական կայքերի վրա կիբեռհարձակումների, զանգվածային բողոքի ցույցերին մասնակցելու համար խմբերի ձևավորման, ինչպես նաև իշխանությունը փոխելու համար ուժի կիրառման սցենարների թույլտվության մասին ձայնագրություններ։
Իշխանության զավթման փորձի շուրջ քրեական գործը հարուցվել էր Civic.am կայքի հրապարակած փաստաթղթի հիման վրա՝ որակելով այն պետության «Հեղաշրջման պլան»։
