ՀՀ ՊՆ պաշտոնատար անձինք մեղադրվում են կաշառք ստանալու, տալու, պաշտոնեական լիազորությունները չարաշահելու, առանձնապես խոշոր չափերով հափշտակության գործով, հայտնում է Հակակոռուպցիոն կոմիտեն:
Ըստ հաղորդագրության՝ 7 անձի, այդ թվում՝ ՊՆ պաշտոնատար անձանց և ՍՊ ընկերությունների տնօրեններին վերաբերյալ քրեական վարույթն ուղարկվել է դատարան։ Տնօրենների նկատմամբ որպես խափանման միջոց է կիրառվել տնային կալանքը, իսկ ՊՆ պաշտոնյաներից մեկի նկատմամբ՝ կալանքը:
Նշվում է, որ ՀՀ ՊՆ N զորամասում շինարարական աշխատանքների իրականացման նպատակով ՊՆ-ի և կապալառու ընկերության միջև 2023 թվականի հունիսին կնքվել է պետական գնման պայմանագիր, որի շրջանակում շինաշխատանքները կատարվել են թերի, իսկ որոշ աշխատանքների համար օգտագործվել են նախատեսվածից 3 անգամ ցածր արժեքով անորակ նյութեր: Արդյունքում՝ ՊՆ-ից խաբեությամբ հափշտակվել է 81 176 000 դրամ:
Ըստ գերատեսչության՝ թերի կատարված աշխատանքներն ընդունելու և դրական եզրակացություններ տալու դիմաց ՊՆ պաշտոնատար անձը կապալառու ընկերության տնօրենից պահանջել է առանձնապես խոշոր չափերով՝ 10 000 000 դրամ կաշառք, որի մի մասն ստացել է:
Նշվում է նաև, որ 2024 թվականի հուլիսին ՊՆ-ի և նույն կապալառու ընկերության միջև կնքվել է պետական գնման ևս մեկ պայմանագիր, որով նախատեսված շինաշխատանքների կատարման ընթացքում հնարավոր թերություններն անտեսելու և պայմանագրի կատարման արդյունքների վերաբերյալ դրական եզրակացություններ տալու համար ընկերության տնօրենն ընդհանուր՝ 2 100 000 կաշառք է տվել ՊՆ երկու պաշտոնատար անձի:
Պարզվել է նաև, որ հիշյալ ընկերությունների ներկայացուցիչները 2024 թվականի հունիսին կաշառք են տվել ՊՆ մեկ այլ պաշտոնատար անձի՝ վերջինիս կողմից ցանկալի բովանդակությամբ տեղեկանք ստանալու համար:
Քրեական վարույթով նախաքննությունն ավարտվել է, և վարույթի նյութերը մեղադրական եզրակացությամբ ուղարկվել են ՀՀ հակակոռուպցիոն դատարան:
