Փետրվարի 13-ի վաղ առավոտյան ՀՀ քննչական կոմիտեի աշխատակիցները խուզարկություն են սկսել «Իզմիրլյան» բժշկական կենտրոնի տնօրեն, պրոֆեսոր Արմեն Չարչյանի աշխատասենյակում:
ԲԿ-ի մամուլի խոսնակ Աննա Դեմիրճյանը լրատվամիջոցներին հայտնել է, որ աշխատասենյակի դուռը փակ է, և իրենք տեղեկություն չունեն, թե որ մարմինն է իրականացնում քննչական գործողությունները: Նրա խոսքով՝ Չարչյանն այսօր վիրահատություններ պետք է իրականացներ, սակայն դրանք կիրականացվեն այլ մասնագետների կողմից:
Քննչական կոմիտեից ստացված պարզաբանման համաձայն՝ քրեական վարույթի նախաքննության շրջանակներում կատարվում են քննչական գործողություններ:
Մանրամասներ «Իզմիրլյան» -ում խուզարկության վարույթից. փաստաբանների գնահատականները
«Իզմիրլյան» ԲԿ-ում իրականացված խուզարկությանն անդրադարձել են փաստաբաններ Էրիկ Ալեքսանյանը և Ռուբեն Մելիքյանը։ Ալեքսանյանը լրագրողների հետ զրույցում նշել է, որ խուզարկությունը կապված է 2015-2025 թվականների որոշ գործարքների ուսումնասիրության հետ, և, որ վարույթը չորս ամսվա վաղեմություն ունի:
Նրա խոսքով՝ նախաձեռնվել է քրեական վարույթ՝ չարամտորեն հարկերից խուսափելու և փողերի լվացման հատկանիշներով:
«Խոսքը վերաբերում է բացառապես հաշվապահական փաստաթղթերին, որոնք կապված են հարկայինի հետ»,- պարզաբանել է փաստաբանը՝ հավելելով, որ վարույթը վերաբերում է 2015-2025թթ․ ընկած ժամանակահատվածում որոշակի ընկերությունների հետ կատարված գործարքներին:
«Ըստ գործարքների՝ ձեռք են բերվել համապատասխան բժշկական պարագաներ, որոնք, իբր, ԲԿ-ն կարող էր ավելի էժան գնով ձեռք բերել անմիջապես ներմուծողից կամ արտադրողից, և իբր դրանք ձեռք են բերվել բարձրաստիճան հոգևորականների հետ փոխկապակցված ընկերություններից»,- մանրամասնել է նա:
Ալեքսանյանը շեշտել է, որ ներկա պահին բերման ենթարկելու կամ ձերբակալելու ոչ նախադրյալներ կան, ոչ էլ վարույթն իրականացնող մարմինը նման բան է պլանավորում: Անդրադառնալով խուզարկության ժամկետներին՝ նա նշել է, որ վարույթը նախաձեռնվել է դեռևս չորս ամիս առաջ։
«Հիմա հարց՝ ո՞րն է պատճառը, որ հիմա են կատարում խուզարկությունը: Կարծում եմ՝ բոլորը շատ լավ գիտեն, որովհետև վերջին ժամանակահատվածում այն, ինչ տեղի է ունենում եկեղեցու, Վեհափառի շուրջ, բոլոր պատասխանները տալիս է»,- շեշտել է նա:
Մեկ այլ փաստաբան՝ Ռուբեն Մելիքյանը, ֆեյսբուքյան գրառման մեջ նշել է, որ Հայ Առաքելական Սուրբ Եկեղեցուն պատկանող «Իզմիրլյան» ԲԿ-ում ընթացող խուզարկությունը «նիկոլական ռեժիմի հերթական ռեպրեսիան է Մայր Եկեղեցու դեմ»:
«Ցավով պետք է արձանագրեմ, որ մեր երկրում «իրավապահ» մարմիններն ամբողջությամբ վերածվել են իշխող քաղաքական ուժի ու անձամբ դրա ղեկավարի նեղ շահերը սպասարկող քաղաքական կառույցների: Այդ մարմինների աշխատանքում «իրավունքի շահ» կոչվածը գնալով մոմի պես հալչում է: Այլ կերպ՝ օրենքի ձևական, ընթացակարգային կողմը պահում են, բայց բովանդակային, արժեքային կողմը ոչ մի կապ չունի բուն իրավունքի հետ»,- գրել է Մելիքյանը:
Փաստաբանի համոզմամբ՝ արդեն իսկ, առանց Քննչական կոմիտեի պարզաբանումներին սպասելու, կարելի է փաստել, որ խուզարկությունը կապ չունի իրավունքի գերակայության և օրինականության հետ:
2024-ի նոյեմբերին Չարչյանի նկատմամբ դատարանի կողմից նշանակված 3 տարի ժամկետով փորձաշրջանը կրճատվել էր, և սահմանվել էր 1 տարի փորձաշրջան։ Փաստաբանը տեղեկացրել է, որ 4 տարի անց վերջնականապես ավարտվել է պրոֆեսոր Չարչյանի քրեական գործը։
2023-ի փետրվարի 13-ին ՀՀ ՔԿ-ից հայտնել էին, որ Չարչյանին մեղադրանք են ներկայացրել, որպես խափանման միջոց էր ընտրվել բացակայելու արգելքը։ Չարչյանը պատգամավորական անձեռնմխելիությունից զրկվել էր 2023-ի փետրվարի 9-ին՝ ՀՀ գլխավոր դատախազի միջնորդության հիման վրա։ Ըստ իրավապահների՝ նա 2017-ին ՊՊԾ գնդի գրավման գործով մեղադրյալ, «Հաց բերող» անվամբ հայտնի Արթուր Սարգսյանի առողջական վիճակի մասին կեղծ եզրակացություն էր տվել: 2024-ին Չարչյանն ազատ էր արձակվել։
