Ստեփանավան քաղաքի Աշոտաբերդ թաղամասի շենքերից մեկում փետրվարի 8-ի գիշերը բռնկված հրդեհի հետևանքով կա զոհ և 6 վիրավոր, հայտնում է ՀՀ ՆԳՆ-ն։
Գերատեսչությունից տեղեկացնում են, որ հրդեհը մեկուսացվել է ժամը 11։22-ին։ Վիրավորներին տեղափոխել են բժշկական կենտրոն։
«Հրդեհաշիջման աշխատանքները շարունակվում են։ Ներգրավված են 8 մարտական հաշվարկ, 40 հրշեջ-փրկարար, ինչպես նաև Ստեփանավանի համայնքապետարանից հատուկ տեխնիկա»,- ասվում է հաղորդագրությունում։
Լոռու մարզպետ Արամ Ղազարյանի աշխատակազմը հայտնել է, որ ՀՀ վարչապետ Նիկոլ Փաշինյանի հանձնարարականով օպերատիվ կերպով իրականացվում են անհրաժեշտ բոլոր աշխատանքները։
«Տարհանված բնակիչների համար հյուրանոցում ստեղծվել են կեցության համար անհրաժեշտ պայմաններ, ներկա պահին իրականացվում է կարիքների գնահատում՝ անհրաժեշտ սննդի, հիգիենիայի պարագաների և հագուստների բաշխման համար: Իրականացվող բոլոր աշխատանքները գտվում են հսկողության ներքո»,- նշվում է հաղորդագրությունում:
Այսօր ավելի վաղ ՆԳՆ-ն հայտնել էր, որ հրդեհ է բռնկվել Ստեփանավան քաղաքի Աշոտաբերդ թաղամասի շենքերից մեկում։ Փրկարարները շենքից տարհանել էին 27 բնակչի։
