Կինոժապավենի հաջողության գրավականը՝ անկեղծությունից բացի նաև փաստագրական ճշգրտությունն է, ինչպես նաև ռազմական արվեստի բոլոր կանոնների համաձայն բեմադրված մարտական տեսարանները, դեկորատորների ու ռեկվիզիտորների աշխատանքը:
Ղարաբաղյան պատերազմը բոլորինս էր անկախ սոցիալական դիրքից, պաշտոնից ու մասնագիտությունից: Չկա մի հայ ընտանիք, որը չի զգացել պատերազմի դառնությունը: Պատերազմը համախմբեց մի ամբողջ ժողովրդի հանուն մեկ նպատակի. հայրենի հողը փրկել էր պետք:
Ղարաբաղյան պատերազմը լոկ կռիվ չէր, այլ հայ ազգի արժանապատվության պայքար էր: Գոյամարտի մասին պատմող հարյուրավոր գրքեր, տեսանյութեր, երգեր, տեսահոլովակներ, ֆիլմեր կան, իսկ ֆիլմը, որն այսօր ներկայացնում ենք ձեզ, համախմբել է իր մեջ մարդկանց կյանքը՝ պատերազմից առաջ և հետո:
Խոսքը «Կյանք ու կռիվ» ֆիլմի մասին է, որը մեծ էկրան է բարձրաձել և նվիրվել Արցախի հերոսներին և ՀՀ անկախության 25-ամյակին: Ֆիլմի ռեժիսորը Մհեր Մկրտչյանն է:
Սյուժեն 25 տարեկան չորս ընկերների շուրջ է զարգանում: Նրանց ընկերությունը տարիների պատմություն ունի դեռևս դպրոցական տարիներից: Ֆիլմն առանձնանում է իր անկեղծությամբ: Դերասանների փայլուն խաղը ամբողջությամբ փոխանցում է այն ժամանակվա տրամադրությունն ու մթնոլորտը: Հերոսների ճակատագրերը տարբեր են, բայց պատմությունը նույնն է` Ղարաբաղյան պատերազմը:
Կինոնկարը մարդկային արժեքների, ընկերության, սիրո և հայրենասիրության մասին է:
