Պետական վերահսկողության ծառայության նախկին ղեկավար Ռոմանոս Պետրոսյանի ժամանակավոր կառավարման տակ անցած «Հայաստանի էլեկտրական ցանցեր» (ՀԷՑ) ՓԲԸ-ում նախատեսված է աուդիտ և հնարավոր կադրային փոփոխություններ՝ թոփ մենեջմենթում։ Այդ մասին ինքը՝ Հանրային ծառայությունները կարգավորող հանձնաժողովի կողմից ՀԷՑ-ի ժամանակավոր կառավարիչ նշանակված Պետրոսյանը հայտնել է լրագրողներին՝ ընկերությունում իր աշխատանքի առաջին օրը: Նա նաև մեկնաբանել է էլեկտրաէներգիայի սակագնի հնարավոր բարձրացումը, որի մասին զգուշացրել էր «Տաշիր» ընկերությունների խմբի փոխնախագահ, ՀԷՑ-ի տնօրենների խորհրդի նախագահ Նարեկ Կարապետյանը
Ավելի ուշ լրագրողների հետ զրույցում Պետրոսյանի հայտարարություններին անդրադարձել է ընկերության գլխավոր տնօրենի պաշտոնակատար Դավիթ Ղազինյանը:
Հնարավոր պաշտոնանկություններ ՀԷՑ-ում
Պետրոսյանը չի բացառել, որ աշխատանքից ազատվելու են ՀԷՑ-ի թոփ-մենեջմենթի ուղղության աշխատակիցները։ Նա հայտարարել է, որ «Ղազինյանը ձև չունի» մնալու իր պաշտոնին, քանի որ ՀԷՑ-ին, նրա խոսքով, «այս վիճակին հասցնողներից մեկն է»։ Նա Ղազինյանին դիմիմ գրելու և հեռանալու կոչ է արել, այլապես իր առաջին հրամանը լինելու է Ղազինյանին ազատելը՝ «վստահության կորստի հիմքով»։
«Ինչ վերաբերում է ազատումներին, ապա այս պահին մասսայական ազատումներ չեն նախատեսվում։ Ազատումներ կլինեն թոփ-մենեջմենթում, աշխատանքից կազատվեն մարդիկ, ովքեր ընկերությունը հասցրել են այն վիճակին, երբ պետությունը ստիպված է կանխարգելիչ միջոցներ ձեռնարկել։ Բայց մենք հարգում ենք էներգետիկ համակարգի վաստակաշատ մասնագետների աշխատանքը, ովքեր պետք է ապահովեն ՀԷՑ-ի անխաթար աշխատանքը։ Ես նրանց խնդրում ու հորդորում եմ իրենց աշխատանքն իրականացնել պատշաճ և որևէ կերպ տուրք չտալ սաբոտաժային հնարավոր ցուցումներին»,- նշել է Պետրոսյանը։
Պետրոսյանը բացառել է մամուլում շրջանառվող տեղեկությունը, թե ՀԷՑ-ի 7000 աշխատակցի նկատմամբ 2026-ի ընտրություններին ընդառաջ վերահսկողություն սահմանելու նպատակ ունեն։
«Վստահության կորստի հիմքով» իրեն աշխատանքից ազատելու հնարավորությունը մեկնաբանելով՝ Ղազինյանը հակադարձել է Պետրոսյանին։
«Իսկ ո՞վ ասաց, որ ես իրեն վստահում եմ։ Ես անձամփ իրեն ու իրենց իշխանությանը չեմ վստահում»,- ընդգծել է Ղազինյանը։
Նա տեղեկացրել է, որ աշխատանքից ազատման դիմում չի գրել ու չի պատրաստվում հետևել Պետրոսյանի կոչին։ Միևնույն ժամանակ նա չի բացառել, որ «բեսպրեդելի» միջոցով կարող են հասնել իր պաշտոնանկությանը, ավելին՝ իր դեմ նույնպես շինծու գործընթաց սկսեն։ Ղազինյանն առանց հիմքի սաբոտաժի հնարավորության վերաբերյալ Պետրոսյանի հայտարարությունը անվանել է «անբարոյականություն»։
Աուդիտ՝ ՀԷՑ-ում
Ըստ Պետրոսյանի՝ «ՀԷՑ-ի ղեկավար կազմի հայտարարությունները հակասում են իրենց իսկ աուդիտի տվյալների հետ»։
«Ես աուդիտ եմ իրականացնելու ՀԷՑ-ում՝ կապված ընկերության վերջին տարիների գործունեության հետ»,- հավելել է Պետրոսյանը։
Էլեկտրաէներգիայի սակագնի ճակատագիրը
Անդրադառնալով սակագնի հնարավոր փոփոխությանը՝ Պետրոսյանը նշել է, որ չի կարող այդ հարցին պատասխանել։ Միևնույն ժամանակ նա ո՛չ հաստատել, ո՛չ հերքել է գների հնարավոր բարձրացումը։
«Սակագնի հարցը բացառապես Հանրային ծառայությունները կարգավորող հանձնաժողովի որոշման տիրույթում է։ Բայց որպես ժամանակավոր կառավարիչ, հարուցված վարույթի շրջանակներում, վեր եմ հանելու բոլոր այն գործոնները, ծախսերը, որոնց հիման վրա ՀԾԿՀ-ն որոշումներ կկայացնի ու կհրապարակի։ Ես չեմ կարող երաշխավորել, թե սակագինը որ ուղղությամբ կգնա, բայց այն բխելու է օբյեկտիվ, իրական այն ցուցանիշներից, որոնք տեսնելու ենք ՀԷՑ-ի գործունեության մեջ։ Հաշվի են առնվելու նաև տնտեսվարողի շահերը՝ իր եկամտաբերության ընդունելի չափերը՝ համաձայնեցված նաև ոլորտը կարգավորող հանձնաժողովի հետ»,- շեշտել է նա։
Նրա խոսքով՝ սակագնի ձևավորման հաշվարկները կատարվելու են «ըստ օրենքի՝ բացառելով մեքենայությունները, հովանավորչությունները, կոռուպցիոն որոշումները»։
Ղազինյանը Պետրոսյանի խոսքերը մանիպուլյատիվ է որակել՝ ընդգծելով, որ նա չի կարողացել ֆիքսել, թե սակագինը առնվազն երկու տարի չի բարձրանալու։
Քննչական կոմիտեն հուլիսի 4-ին Armenia Today-ին տեղեկացրել էր, որ ընկերության գրասենյակում կատարված խուզարկություններից հետո հարուցված գործի շրջանակում կալանավորվածների թիվը հասել է չորսի։ Հուլիսի 8-ին իրավապահները քննչական գործողություններ էին իրականացրել ՀԷՑ-ում և ընկերության տնօրենների խորհրդի նախագահ Նարեկ Կարապետյանի տանը։
ՀՀ նախագահ Վահագն Խաչատուրյանը հուլիսի 8-ին ստորագրել էր ընկերության պետականացմանը միտված օրենքները։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել
