Moody’s վարկանիշային գործակալությունը հաստատել է Հայաստանի սուվերեն Ba3 վարկանիշը՝ փոխելով կանխատեսումը «բացասականից» «կայունի», հայտնում է Հայաստանի ֆինանսների նախարարությունը։
Գործակալությունը կանխատեսման վերանայումը բացատրել է Հայաստանի տնտեսական և հարկաբյուջետային հեռանկարների բարելավմամբ, ինչպես նաև ռիսկերի հաշվեկշռով 2022 թվականի մարտի համեմատ, երբ վերջին անգամ վարկանիշ էր նշանակվել, պարզաբանել է գործակալությունը։ Գործակալությունը գնահատում է, որ Հայաստանի տնտեսական և հարկաբյուջետային ցուցանիշները զգալիորեն բարելավվել են 2022 թվականին՝ պայմանավորված կապիտալի և աշխատուժի ներհոսքերով, որոնց մի մասը ակնկալվում է, որ կշարունակվի։ Moody’s-ի կանխատեսումների համաձայն՝ Հայաստանի տնտեսական աճը կմնա կայուն՝ 2023 թվականին այն կկազմի 7%, 2024 թվականին՝ 5-6%։
Բացի այդ, գործակալությունը կանխատեսում է, որ հարկաբյուջետային ցուցանիշները կկայունանան ընթացիկ մակարդակներում, իսկ պարտքի բեռը կլինի ավելի ցածր մակարդակի վրա, քան նախահամաճարակային ժամանակաշրջանում՝ առաջիկա տարիներին կայունանալով 45%-ով և կնպաստի հարկաբյուջետային կայունության ամրապնդմանը։
Վարկանիշային գործակալության ներկայացուցիչները, սակայն, նկարագրելով երկրի տնտեսական և հարկաբյուջետային իրավիճակը, մատնանշել են աշխարհաքաղաքական ռիսկերը, որոնք զսպում են առկա բարելավումները։
