«Տաշիր» ընկերությունների խմբի նախագահ, բարերար Սամվել Կարապետյանն ազատություն ստանալու դիմաց գործարքի չի գնա, մամուլի ասուլիսի ժամանակ հայտարարել է ՀԷՑ գլխավոր տնօրենի պաշտոնակատար Դավիթ Ղազինյանը։
Ըստ նրա՝ Կարապետյանին ճանաչողները դրանում վստահ են։ «Հաստատապես ինքը (Սամվել Կարապետյանը – AT) կարող է ասել։ Բայց ես համոզված եմ, որ դա էլ պնդելու է։ Ոչ թե պայմանավորվածությունների հնարավոր չէ գնալ, այլ այդպիսի գործարքների։ Գործարքի գնալու պարագայում չէր հայտնվի այս վիճակում, ինչո՞ւ պետք է հայտնվեր, նոր գնար գործարքի»,- հստակեցրել է Ղազինյանը։
Հունիսի 19-ին դատարանը երկու ամսով կալանավորել էր «Տաշիր» ընկերությունների խմբի նախագահ Սամվել Կարապետյանին այն բանից հետո, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը:
Կարապետյանին մեղադրում են իշխանությունը զավթելու կոչեր անելու մեջ։ Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
