ՀՀ վարչապետ Նիկոլ Փաշինյանը պատրաստակամություն է հայտնել Ամենայն Հայոց կաթողիկոսին ու Տեր Զարեհ Աշուրյանին ընդունել ու ապացուցել, որ թլպատված չէ։ Այս մասին նա հայտարարել է սոցիալական ցանցերի իր էջերում՝ պատասխանելով Աշուրյանի հրապարակմանը, թե որոշ կեղծ հավատացյալներ «Սուրբ դրոշմի կնիքը թլպատության նշանով են փոխարինել»։
«Պատրաստ եմ ընդունել Կտրիճ Ներսիսյանին (Ամենայն Հայոց Կաթողիկոս Գարեգին Բ) ու իր խոսնակին և ապացուցել հակառակը։ Իսկ ինքը թող, ի վերջո, պատասխանի հարցին, կուսակրոնության ուխտը խախտե՞լ է, թե՞ ոչ։ Զավակ ունի՞, թե՞ ոչ»,- գրել է վարչապետը։
Ավելի վաղ Աշուրյանը գրել էր, որ «Առաքելական Սուրբ եկեղեցին պետք է րոպե առաջ մաքրել ազգադավ, նախնյաց հիշատակն անարգած, մկրտության ուխտը դրժած և Սուրբ դրոշմի կնիքը թլպատության նշանով փոխած կեղծ հավատացյալներից»: Հոգևորականը չէր նշել Փաշինյանի անունը։
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներով անդրադարձել էր հոգևորականներին ու նշել, որ պետությունը պետք է մասնակից լինի կաթողիկոսի ընտրություններին։ Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ։
Հունիսի 2-ին Փաշինյանը հայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդը կոչ էր արել կասեցնել «վարչապետի անօրինական և անհեռատես քաղաքականությունը»։
Սուրբ Աթոռի միաբանական համագումարը հունիսի 23-ի հայտարարության մեջ Փաշինյանի կողմից եկեղեցուն ուղղված քայլերը հայ եկեղեցականությանը վարկաբեկելու փորձ էր անվանել:
Դիտեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
