Ռուսաստանը մշտապես հայ ժողովրդի վիշտն ընկալել է որպես սեփական, հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ խոսելով Հայոց ցեղասպանության 110-րդ տարելիցի մասին։
Նրա խոսքով՝ անհնար է «պատեհապաշտ նպատակներով մոռանալ անցյալի հանցագործությունները»։ Զախարովան ընդգծել է, որ Ռուսաստանն աշխարհում առաջիններից էր, որ ճանաչել է Հայոց ցեղասպանությունը դեռևս 1915 թվականին, և նշել, որ ռուսական բանակն այդ տարիներին փրկել է ավելի քան 300 հազար հայի։
Զախարովան նաև հիշեցրել է, որ 2015 թվականին ՌԴ նախագահ Վլադիմիր Պուտինը մասնակցել է Ծիծեռնակաբերդում տեղի ունեցած հիշատակի արարողությանը։
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 110-րդ տարելիցը։ Աշխարհասփյուռ հայությունը ոգեկոչման միջոցառումներով կհիշի 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 110 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Մարտին Հայաստանի վարչապետ Նիկոլ Փաշինյանը թուրքական լրատվամիջոցներին տված հարցազրույցում հայտարարել էր, որ Հայոց ցեղասպանության միջազգային ճանաչումը պաշտոնական Երևանի արտաքին քաղաքական առաջնահերթություններից չէ։
