Ռուսաստանի հայերի միության նախագահ Արա Աբրահամյանը հայտարարել է, որ Հայաստան իր մուտքը խոչընդոտելը կապված է իր հայանպաստ գործունեության հետ։
Ըստ նրա՝ «պատճառը շատ պարզ է» և հավանաբար կապված է Հայաստանի քաղաքականությանը, հասարակական գործերին իր մասնակցության և բարեգործական ծրագրեր իրաործելու հետ։
Աբրահամյանը նշել է, որ վերջին տարիների ընթացքում շուրջ 200 փախստականի 2-3 սենյականոց բնակարաններ է նվիրել, Արցախում կառուցել 600 տեղանոց դպրոց և մարզահամալիր, նորոգել Կույրերի միավորման գրասենյակը, մշակույթի պալատը, Արցախում կառուցել է գործարաններ, հարյուր հազարավոր դոլարների ներդրումներ է կատարել Արցախի գրողների միությունում։
«Ես կարող եմ շարունակել այս ամենը թվարկել ևս երկու ժամ: Ըստ երևույթին՝ այս կետերից մեկը տեղի իշխանություններին դրդել է կանխել իմ մուտքը Հայաստան»,- նշել է նա։
Նա ընդգծել է, որ այդ ծրագրերն իրականացրել է Ռուսաստանի հայերի միության միջոցով, որը 100%-ով ֆինանսավորվում է միայն իր կողմից։
Մարտի 28-ին Armenia Today-ին իրազեկ աղբյուրները հայտնել էին, որ Աբրահամյանին Երևանի «Զվարթնոց» օդանավակայանում արգելել են մուտք գործել Հայաստան։ Ավելի քան 5 ժամ պահելուց հետո Ռուսաստանի հայերի միության նախագահին թույլատրել էին մուտք գործել Հայաստան։
Ավելի վաղ Աբրահամյանը քննադատել էր Հայաստանի ղեկավարությանը Բաքվից հայ գերիներին ազատ արձակելու հարցում անգործության համար: Աբրահամյանը հայտարարել էր, որ «իսկական ղեկավարը չի լռում, որ չվնասի, այլ խոսում ու գործում է այնպես, որ օգնի յուրայիններին»։
Հայաստան մուտքի արգելք էր սահմանվել ՌԴ պետդումայի պատգամավոր Կոնստանտին Զատուլինի, Россия сегодня միջազգային լրատվական գործակալության և RT հեռուստաալիքի գլխավոր խմբագիր Մարգարիտա Սիմոնյանի, մեդիամենեջեր Արամ Գաբրելյանովի և Հայաստանի հետ բարեկամության և համագործակցության ռուսական ընկերության ղեկավար Վիկտոր Կրիվոպուսկովի նկատմամբ:
