Պաշտպանության նախարար Սուրեն Պապիկյանը լրագրողներին հայտնել է, որ ադրբեջանական կողմը չի ընդունել, որ մայիսի 29-ին իրենք են կրակել Սյունիքի մարզի Խոզնավար բնակավայրի տներից մեկին։
«ՊՆ-ն պարզաբանում է ուզել Ադրբեջանից, պատասխանը լսել եք՝ հրաժարվել են, որ իրենք են արել»,- ասել է Պապիկյանը։
Մայիսի 29-ին ՊՆ-ն հայտնել էր, որ Ադրբեջանի զինված ուժերի ստորաբաժանումները ժամը 01:00-01:15-ն ընկած ժամանակահատվածում կրակ են բացել Սյունիքի մարզի Խոզնավար բնակավայրի ուղղությամբ, ինչի հետևանքով վնասվել է բնակելի տուն։ Գերատեսչությունն ադրբեջանական կողմին կոչ էր արել հետաքննել Խոզնավարի բնակելի տան գնդակոծման փաստը և հանդես գալ հրապարակային պարզաբանումներով։
Մայիսի 7-ին հայտնի էր դարձել, որ Ադրբեջանը Հայաստանին հրադադարի ռեժիմի խախտումների մասին տեղեկություններ է փոխանցել: Մայիսի 8-ին ՀՀ ՊՆ-ն հայտնել էր, որ ադրբեջանական կողմը կրակ է բացել Սյունիքի Խնածախ գյուղի ուղղությամբ, ինչի հետևանքով վնասվել էր բնակելի տան տանիքը: Նմանատիպ խախտումներ նաև նախորդ ամիս էին գրանցվել:
