ՀՀ վարչապետ Նիկոլ Փաշինյանը մերժել է Վաշինգտոնի առաջարկը՝ դիմել ԱՄՆ նախագահ Դոնալդ Թրամփին՝ միջնորդելու Արցախի նախկին պետնախարար Ռուբեն Վարդանյանին ազատ արձակելու համար, հայտնել է «Հրապարակը»՝ հղում անելով իր աղբյուրներին։
«Հայ ազդեցիկ գործիչները կապվել են Թրամփի դստեր՝ Իվանկա Թրամփի ամուսնու՝ Ջարեդ Կուշների հետ և բանակցել: ԱՄՆ նախագահը, որն այն քիչ մարդկանցից է, որը կարող է այս հարցը լուծել, համաձայնել է միջամտել, եթե ՀՀ իշխանությունները դիմեն իրեն այդ առաջարկով: ԱՄՆ-ում ՀՀ դեսպան Լիլիթ Մակունցի միջոցով Փաշինյանին են փոխանցել այս առաջարկը, որ ընդամենը մի թղթի կտոր է պետք, որպեսզի պաշտոնական հիմք լինի ԱՄՆ նախագահի համար, սակայն մերժում են ստացել»,- գրել է թերթը։
Ըստ թերթի՝ որոշումը հիմնավորվել է այն հանգամանքով, որ գրությունը կարող է վնաս հասցնել հայ-ադրբեջանական խաղաղության պայմանագրի ստորագրման գործընթացին։
2022 թվականին Վարդանյանը տեղափոխվել էր Արցախ և նույն թվականի նոյեմբերին դարձել Արցախի պետնախարար, սակայն 2023 թվականի փետրվարի վերջին թողել էր պաշտոնը։ 2023-ի սեպտեմբերի 27-ին՝ Արցախի վրա Ադրբեջանի հարձակումից հետո, Ադրբեջանի սահմանապահ ծառայությունը գործարարին ձերբակալել էր Հայաստանի հետ սահմանը հատելու փորձի ժամանակ։ Այժմ նա գտնվում է Բաքվի բանտում։
Ադրբեջանում, պաշտոնական տվյալներով, 23 հայ գերի կա։ 2024-ի դեկտեմբերին Բաքուն դատարան է ուղարկել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին սկսվել են Արցախի առաջնորդների դատավարությունները:
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, պետնախարար Ռուբեն Վարդանյանը, ԱԺ նախագահ Դավիթ Իշխանյանը, արտգործնախարար Դավիթ Բաբայանը, պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Ռուբեն Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
