«Տաշիր» ընկերությունների խմբի նախագահ Սամվել Կարապետյանի ընտանիքը ՀՀ պետական մարմիններին պաշտոնապես ծանուցել է ներդրումային վեճ սկսելու մասին, հայտնել է ընկերությունների խմբի մամուլի ծառայությունը:
Նշվում է, որ ծանուցումը հիմնված է Հայաստանի և Կիպրոսի կառավարությունների միջև ներդրումների խրախուսման և պաշտպանության մասին 1995 թվականի հունվարի 18-ին ստորագրված համաձայնագրի վրա, որը ներդրողներին իրավունք է տալիս դիմել Միջազգային արբիտրաժ, եթե նրանց իրավունքները խախտվում են պետության կողմից:
Հաղորդագրության մեջ ասվում է, որ նման ընթացակարգերը բացասաբար են անդրադառնում երկրների ներդրումային գրավչության վրա։
Ըստ մամուլի ծառայության՝ Կարապետյանների ընտանիքը պահանջներ է ներկայացրել Սամվել Կարապետյանի և նրա բիզնեսի դեմ վարչապետի կողմից սկսված արշավի պատճառով, որը հաջորդել է «իշխանությունների կողմից հարձակման ենթարկված» եկեղեցու պաշտպանությամբ հանդես եկած գործարարի հարցազրույցին:
Վարչապետը, մասնավորապես, հայտարարել է Կարապետյանի ընտանիքին պատկանող «Հայաստանի էլեկտրական ցանցեր» ՓԲԸ-ի պետականացման մասին, այդ թվում՝ Կիպրոսում գրանցված Liormand Holdings Limited-ի միջոցով։
Հաղորդագրության համաձայն՝ ներդրումային վեճ սկսելու մասին ծանուցումը նախազգուշական բնույթ է կրում։ Դրանում բաժնետերերը պնդում են, որ հայ պաշտոնյաների գործողություններն «ինքնակամ են, խտրական, քաղաքական դրդապատճառներ ունեն» և ուղղված են ՀԷՑ-ի միջոցով Կարապետյանի ընտանիքին սեփականությունից զրկելուն:
Բաժնետերերի կարծիքով՝ այդ գործողությունները խախտում են 1995 թվականի հունվարի 18-ի Կիպրոսի հետ համաձայնագրով ՀՀ ստանձնած մի շարք պարտավորություններ, որոնք պետությունը պետք է կատարի:
«Նախ՝ հայ պաշտոնյաները չեն ապահովել Կարապետյանի ընտանիքի նկատմամբ արդար և հավասար վերաբերմունք, ինչպես նաև Հայաստանում ներդրումների պատշաճ պաշտպանությունն ու անվտանգությունը։ Երկրորդ՝ ի հեճուկս ներդրումային համաձայնագրի, ՀՀ ներկայացուցիչները քայլեր են ձեռնարկում ՀԷՑ-ի օտարման ուղղությամբ, ինչը փաստացի ունեզրկում է»,- ասվում է հաղորդագրության մեջ:
Ընդգծվում է, որ եթե պատասխանատու պաշտոնատար անձինք շարունակեն խախտել համաձայնագրով և միջազգային իրավունքի նորմերով նախատեսված իրենց պարտավորությունները, Հայաստանի Հանրապետությանն սպառնում են միջազգային արբիտրաժային վարույթներ և ամբողջական փոխհատուցում վճարելու պարտավորություններ:
Հաղորդագրության մեջ նշվում է, որ ներկայումս Հայաստանն արդեն մի քանի հայցի է բախվում միջազգային արբիտրաժին Կիպրոսից, ԱՄՆ-ից, Կանադայից և Լիբանանից ներդրողների կողմից: Այս հայցերն օտարերկրյա ներդրողներին դուրս մղելու և նրանց օրինական իրավունքների իրացմանը խոչընդոտելու հայկական իշխանությունների անօրինական գործողությունների արդյունք են, ընդգծել է մամուլի ծառայությունը:
Հունիսի 19-ին դատարանը երկու ամսով կալանավորել էր Կարապետյանին, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: ՀՀ վարչապետ Նիկոլ Փաշինյանը խիստ էր արձագանքել Կարապետյանի հայտարարությանը:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
