Իսրայելի կենտրոնական հատվածում իրանական հրթիռների հարվածների հետևանքով զոհերի թիվը հասել է 3-ի, շուրջ 80 մարդ հոսպիտալացվել է, հայտնում է Time of Israel-ը:
Հրթիռները հարվածել են առնվազն երկու շենքի։ Նշվում է զգալի նյութական վնասի մասին։ Հարվածի տակ է հայտնվել նաև Պետախ Տիկվա քաղաքը, որտեղ բազմաթիվ հայեր են բնակվում:
Իսրայելի ոստիկանության հրամանատար Յաիր Հեցրոնին ասել է, որ իրավապահները սկանավորում են տարածքը՝ փլատակներում մնացած զոհերի որոնման նպատակով, սակայն այս պահի դրությամբ՝ որևէ մեկին չեն հայտնաբերել։ Փրկարարները շարունակում են որոնումները։
Հարվածներից տուժել է նաև Հայֆա քաղաքը, որտեղ ևս մեծաթիվ հայեր են բնակվում: Տուժածների մասին տեղեկություն այս պահին չկա:
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ Պաշտոնական Երևանը դատապարտել էր Իսրայելի հարձակումն Իրանի վրա։ Երկու կողմն էլ հայտնել է զոհերի և բազմաթիվ տուժածների մասին:
