Ինդիանա նահանգը բանաձև է ընդունել, որով ԱՄՆ-ին կոչ է անում Արցախի էթնիկ զտումների համար պատասխանատվության ենթարկել Ադրբեջանին

Ինդիանա նահանգի Սենատը բանաձև է ընդունել, որով ԱՄՆ-ին կոչ է անում Արցախի էթնիկ զտումների համար պատասխանատվության ենթարկել Ադրբեջանին, հայտնում է armenianweekly.com-ը։ 

Բանաձևը, որը հեղինակել է նահանգային սենատոր Էնդի Զեյը (հանրապետական) և համահեղինակել են ներկայացուցիչ Լորիսա Սվիթը և ներկայացուցիչ Հանթեր Սմիթը, ճանաչում են Ադրբեջանի կողմից հայ քրիստոնյաների հետապնդումներն Արցախի Հանրապետությունում որպես էթնիկ զտման գործողություն և Ինդիանայի Կոնգրեսի պատվիրակությանը կոչ անում դադարեցնել ԱՄՆ-ի աջակցությունն Ադրբեջանին՝ «Ազատության աջակցության մասին» օրենքի 907-րդ հոդվածի համաձայն ռազմական օգնության արգելքներ կիրառելով:

«Ինդիանան միշտ հանձնառու է մարդու իրավունքների և կրոնական ազատության պաշտպանությանը»,- ասել է սենատոր Զեյը Սենատում բանաձևի ընդունումից հետո արված հայտարարության մեջ:

Նրա խոսքով՝ մարդիկ պետք է կարողանան ազատորեն դավանել իրենց կրոնը՝ առանց հալածանքների և վախի: 

Բանաձևը նաև կոչ է անում Մագնիտսկու համաշխարհային պատժամիջոցներ կիրառել պատերազմական հանցագործությունների մեջ մեղավոր Ադրբեջանի պաշտոնյաների նկատմամբ, Միացյալ Նահանգներին կոչ է անում ապահովել անօրինական պահվող հայ ռազմագերիների և քաղբանտարկյալների անհապաղ և անվերապահ ազատ արձակումը և հաստատում է արցախահայերի՝ անվտանգ վերադառնալու հիմնարար իրավունքը։

Ադրբեջանում, պաշտոնական տվյալներով, 23 հայ գերի կա։ Իրավապաշտպան Սիրանուշ Սահակյանի տվյալներով՝ Ադրբեջանում գերեվարման մեջ գտնվող շուրջ 80 հայ ենթարկվել է բռնի անհետացման։ 2024-ի դեկտեմբերին Բաքուն դատարան է ուղարկել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին սկսվել են Արցախի առաջնորդների դատավարությունները:

Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, պետնախարար Ռուբեն Վարդանյանը, ԱԺ  նախագահ Դավիթ Իշխանյանը, արտգործնախարար Դավիթ Բաբայանը, պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Ռուբեն Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։

2023 թվականի սեպտեմբերի 19-ին Ադրբեջանը հարձակվել էր Արցախի վրա։ Ռազմական գործողությունների ավարտից հետո Արցախի ողջ բնակչությունը բռնատեղահանվել էր։ Արցախից բռնի տեղահանված 100 632 քաղաքացի էր հասել ՀՀ։