ՀՀ ԱԺ նախագահ Ալեն Սիմոնյանը նախատեսում է օդանավակայանում անձամբ դիմավորել ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյին։ Այս մասին նա հայտարարել է ԱԺ-ում լրագրողների հետ զրույցում։
«Ինձ այդ մասին հարցրեց Մատվիենկոն, երբ հանդիպեցի Նենսի Փելոսիին (ԱՄՆ Ներկայացուցիչների պալատի անդամ – խմբ)։ Ես խոստացա, որ նրան նույնպես կդիմավորեմ: Դա կանեմ, ինչպես իմ կիպրոսցի գործընկեր Անիտա Դիմիտրիուի դեպքում էր»,- ասել է նա։
Սիմոնյանի խոսքով՝ բացառիկ դեպքերում է այդպես լինում, սակայն արձանագրությամբ՝ ԱԺ նախագահներին դիմավորում է, օրինակ, փոխխոսնակներից կամ բարեկամական խմբի անդամներից մեկը։
Պատասխանելով հարցին, որ «ինչ-որ մարդիկ ցանկանում են երկու աթոռի վրա նստել, ԱԺ նախագահը նշել է, որ «այդ մարդիկ կնստեն ոչ թե աթոռների վրա, այլ բանտերում»։
«Կարո՞ղ եք ասել աշխարհում գոյություն ունեցող մի երկիր, որն ամբողջությամբ մի քաղաքական գիծ է վարում։ Քաղաքական առումով նման երկրները դառնում են ծայրագավառներ և դադարում են գոյություն ունենալ։ ՀՀ-ն բարի հարաբերություններ ունի Ֆրանսիայի, ԱՄՆ-ի հետ, փորձելու է հարաբերությունները կարգավորել Ռուսաստանի հետ, բայց դա չի նշանակում, որ այդ երկրները պետք է իրենց դրածոներին փորձեն այստեղ իշխանության բերել կամ հայկական տնտեսությունն իրենցով անել»,- ասել է նա։
Սիմանյոնն ընդգծել է, որ «լավ բան չէ երկիրն ամբողջությամբ մեկ խողովակից կախելը և մեկ ճանապարհով տանելը»՝ ամենևին չկարևորելով, թե խոսքը որ ճանապարհի մասին է։
«Չի կարելի լինել միայն արևմտամետ կամ ռուսամետ, պետք է քո երկրի շահերով առաջնորդվես։ Մոսկվան ունի իր օրակարգը, ՀՀ-ն՝ իր, Իրանն ու ԱՄՆ-ն ունեն իրենց տեսլականը։ Քաղաքական գործչի աշխատանքի ամբողջ իմաստը բոլորի ցանկության մեջ հայկականն սպասարկելն է»,- եզրափակել է ԱԺ նախագահը։
