Իրանն ու Ադրբեջանը համատեղ զորավարժություններ են անցկացնում Արցախում, հաղորդում է իրանական Tasnim գործակալությունը։
«Արազ-2025» անվանումով համատեղ զորավարժությունները մեկնարկել են մայիսի 18-ին՝ օկուպացված Արցախի տարածքներում (խմբ․):
Նշվում է, որ զորավարժություններին կմասնակցեն Իրանի Իսլամական հեղափոխության պահապանների կորպուսի (ԻՀՊԿ) հատուկ նշանակության ստորաբաժանումները և Ադրբեջանի ԶՈu-ն: Իրանական կողմից զորավարժությունների ղեկավար, ԻՀՊԿ ցամաքային զորքերի հրամանատարի տեղակալ Վալի Մադանին հայտարարել է, որ զորավարժությունները «կարևոր քայլ են ընդհանուր սահմանի անվտանգության ամրապնդման և հնարավոր սպառնալիքներին հակազդելու համար»:
Զորավարժությունների անցկացման մասին հայտնել է նաև Ադրբեջանի ՊՆ-ն: Գերատեսչության տվյալներով՝ զորավարժություններին մասնակցելու համար Ադրբեջան են ժամանել մասնակիցներ Իրանից։ Զորավարժությունները կտևեն մինչև մայիսի 21-ը:
2024 թվականի նոյեմբերին ԻՀՊԿ ցամաքային զորքերը համատեղ զորավարժություններ էին անցկացրել Ադրբեջանի բանակի հետ։ Այն ժամանակ զորավարժություններն անցկացվել էին Իրանի հյուսիս-արևմուտքում։ 2025 թվականի ապրիլին համատեղ զորավարժություններ էին անցկացրել Հայաստանի և Իրանի զինված ուժերի հատուկ նշանակության ստորաբաժանումները։ Զորավարժություններն անցկացվել էին երկու երկրների տարածքներում։
