Հայաստանն Ադրբեջանին առաջարկել է ստորագրել երկու փաստաթուղթ միևնույն օրը՝ խաղաղության պայմանագիրը և ԵԱՀԿ-ի Մինսկի խմբի լուծարման գործընթացի մասին դիմումը, թուրքական NTV հեռուստաընկերությանը հայտարարել է ՀՀ ԱԳ նախարար Արարատ Միրզոյանը։
«Եթե մենք ընդունում ենք, որ հակամարտությունն ավարտված է, և այդ փաստը հաստատված է խաղաղության պայմանագրով, ապա այդ դեպքում ո՛չ Մինսկի խումբը, ո՛չ էլ նրա ենթակա կառույցներն այլևս նպատակահարմարություն չեն ունենում։ Հենց այդ տրամաբանությամբ մենք առաջարկել ենք ստորագրել երկու փաստաթուղթ միևնույն օրը՝ խաղաղության պայմանագիրը, ինչպես նաև ԵԱՀԿ-ին կամ նրա անդամ պետություններին ուղղված համատեղ դիմումը, որով կսկսվի Մինսկի խմբի լուծարման գործընթացը»,- ասել է Միրզոյանը։
Նա «աննախադեպ, պատմական իրադարձություն» է անվանել Հայաստանի և Ադրբեջանի միջև խաղաղության համաձայնագրի տեքստի համաձայնեցումը։
«Տեքստ, որով Հայաստանը և Ադրբեջանը փոխադարձաբար ճանաչել են միմյանց տարածքային ամբողջականությունն այն սահմաններում, որոնք գոյություն ունեին որպես խորհրդային սոցիալիստական հանրապետություններ Խորհրդային Միության փլուզման պահին»,- նշել է Միրզոյանը։
Նրա խոսքով՝ կողմերը համաձայնել են չմիջամտել միմյանց ներքին գործերին, ինչպես նաև համաձայնության են եկել մի շարք այլ կարևոր դրույթների շուրջ։ Բացի այդ, ըստ նախարարի, փաստաթղթի վավերացման և ուժի մեջ մտնելու դեպքում նախատեսվում է ստեղծել երկկողմ հանձնաժողով, որը կվերահսկի պայմանագրի իրականացումը և կծառայի որպես հարթակ տեղում առաջացող ցանկացած թյուրըմբռնման կամ կոնկրետ իրավիճակների լուծման համար։
Միրզոյանը չի բացառել, որ պայմանագրի ստորագրումը կարող է լինել Հայաստանի և Ադրբեջանի սահմանին կամ որևէ երրորդ երկրում, որը ընդունելի կլինի թե՛ Երևանի, թե՛ Բաքվի համար։
ՀՀ ԱԳ նախարարն անրադարձել է նաև, այսպես կոչված, «Զանգեզուրի միջանցքին»՝ շեշտելով, որ «միջանցքի» տրամաբանությունը, որը ենթադրում է որոշակի սուվերենության սահմանափակումներ, հայկական կողմի համար անընդունելի է։
Հայաստանի և Ադրբեջանի արտգործնախարարներ Միրզոյանը և Ջեյհուն Բայրամովը ապրիլի 12-ին Անթալիայի դիվանագիտական ֆորումի շրջանակներում երկկողմ հանդիպման ժամանակ վերահաստատել էին երկխոսությունը շարունակելու պատրաստակամությունը։
Մարտի 13-ին Բայրամովը հայտարարել էր, որ խաղաղության պայմանագրի տեքստի շուրջ բանակցությունների գործընթացն արդեն ավարտված է։ Նրա խոսքով՝ հայկական կողմը հայտնել է, որ ընդունել է վերջին երկու կետերը, որոնք մինչ այժմ համաձայնեցված չէին։ Պաշտոնական Երևանը հաստատել էր նախագծի հաստատման ավարտը և հայտարարել, որ պատրաստ է Բաքվի հետ սկսել խորհրդակցություններ համաձայնագրի ստորագրման ժամկետների և վայրի շուրջ։ Մարտի 14-ին Միրզոյանը մանրամասներ էր ներկայացրել խաղաղության պայմանագրի դրույթների մասին։
