Վարչապետ Նիկոլ Փաշինյանը «Քաղաքացիական պայմանագիր» կուսակցության վարչության անդամներին հանձնարարել է կազմել վատ աշխատող պաշտոնյաների ցուցակ և պարզել Գյումրիի ընտրություններում սակավ ձայների պատճառը, գրել է «Հրապարակ» թերթը։
Լրատվականի տեղեկություններով՝ ապրիլի 1-ին վարչության նիստում վարչապետը խոսել է արմատական փոփոխությունների մասին, կարգադրել վերլուծել ոլորտները և գտնել դրանց համար պատասխանատու անձանց։
Թերթը նշել է, որ ՔՊ խմբակցությունում էլ կանայք են ակտիվացել ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի դեմ։ Նրանք ԱԺ նախագահից պահանջում են ստեղծել էթիկայի հանձնաժողով՝ ընդառաջելով լրագրողների դիմումին։ Էթիկայի հանձնաժողով ստեղծելու հարցը պետաիրավական հանձնաժողովի նիստում է քննարկվել, նշել է թերթը։
Քոչարյանի և Tribune.am կայքի լրատվական ծառայության ղեկավար Հռիփսիմե Ջեբեջյանի միջև տեղի ունեցած միջադեպից հետո 161 լրագրող ստորագրություն է թողել էթիկայի հանձնաժողով ձևավորելու պահանջով նամակի տակ։
