ԱՄՆ նախագահ Դոնալդ Թրամփը մի շարք երկրների համար ներմուծման փոխադարձ մաքսատուրքեր է սահմանել (Reciprocal Tariffs), երկրների թվում է Հայաստանը, տեղեկանում ենք ԱՄՆ նախագահի X-ի էջից։
Հայաստանի համար սահմանված մաքսատուրքը 10% է։
Ամերիկագետ Սուրեն Սարգսյանը գրել է, որ որոշման հետևանքով հայկական ապրանքների գներն ԱՄՆ շուկայում կբարձրանան։
«Գների բարձրացումը կազդի հայկական ապրանքների մրցունակության վրա։ Որոշ առանցքային ոլորտներ կարող են տուժել պահանջարկի նվազման պատճառով, մասնավորապես՝ ալյումինի, քարերի, թանկարժեք մետաղների, գյուղատնտեսական արտադրանքի և ալկոհոլի արտահանումը»,- նշել է փորձագետը։
Սարգսյանն ընդգծել է, որ 2024 թվականին Հայաստանի և ԱՄՆ-ի միջև ընդհանուր ապրանքային առևտրի ծավալը գնահատվել է 282,4 մլն դոլար։
«ԱՄՆ-ի ապրանքային արտահանումը Հայաստան կազմել է 160,8 մլն դոլար, ինչը 14,8%-ով (27,9 մլն դոլարով) պակաս է 2023-ի ցուցանիշից։ ԱՄՆ-ի ապրանքային ներմուծումը Հայաստանից 2024-ին կազմել է 121,6 միլիոն դոլար, որը 8,4%-ով (11,1 մլն դոլարով) նվազել է 2023-ի համեմատ։ ԱՄՆ-ի ապրանքային առևտրային ավելցուկը Հայաստանի հետ կազմել է 39,2 միլիոն դոլար, ինչը 2023-ի համեմատ 29,9%-ով (16,7 մլն դոլարով) կրճատվել է»,- հայտնել է նա։
2024-ի նոյեմբերին ՀՀ էկոնոմիկայի նախարար Գևորգ Պապոյանը հայտարարել էր, որ Հայաստանից ԱՄՆ արտահանումը 2024-ի հունվար-հոկտեմբեր ամիսներին աճել է 25%-ով և կազմել 50,2 մլն դոլար։ Միևնույն ժամանակ՝ նա շեշտել էր, որ ԱՄՆ-ի հետ ընդհանուր առևտրաշրջանառությունը նշված ժամանակահատվածում նվազել է 59%-ով, քանի որ կտրուկ կրճատվել է ներմուծումը։ Նրա տվյալներով՝ ԱՄՆ-ից ավտոմեքենաների ներմուծումը կրճատվել էր 3,5 անգամ կամ 442 մլն դոլարով։ Նախարարը նշել էր, որ ՀՀ-ից ԱՄՆ հիմնականում արտահանել են ոսկերչական իրեր, թռչող սարքեր, ալկոհոլային խմիչքներ, ջրեր, ծխախոտ։
