Գյումրիում և Փարաքարում իշխանությունները հաղթանակ ապահովելու համար դիմել են «կրիմինալների» օգնությանը․ ԶԼՄ

«Քաղաքացիական պայմանագիրը» դիմել է քրեական հեղինակություններին ու խոշոր գործարարներին՝ Գյումրի և Փարաքար համայնքների ընտրություններում իր հաղթանակն ապահովելու համար, գրում է «Ժողովուրդ» թերթը՝ վկայակոչելով իր աղբյուրները։

Ըստ կայքի՝ այս գործընթացում ներգրավված են նաև իրավապահ մարմինները, որոնք փետրվարի 6-ին Փարաքար համայնքի Մերձավան գյուղում տեղի ունեցած սպանության գործով հիմնականում ձերբակալում են ընդդիմադիր թեկնածուի կողմնակիցներին։

Փարաքարում երկու հիմնական թեկնածու կա՝ «Քաղաքացիական պայմանագրից» Լյուդվիգ Գյուլնազարյանը, ով 2024 թվականին աղմկահարույց միջադեպից հետո հրաժարական էր տվել, և ընդդիմադիր Վոլոդյա Գրիգորյանը՝ «Ապրելու երկիր» կուսակցությունից։

Թերթը հիշեցրել է, որ այս համայնքում 2021 թվականի ընտրությունները նույնպես բուռն էին։ Իշխող «Քաղաքացիական պայմանագիր» կուսակցությունը պարտություն էր կրել, ամենաշատ ձայները ստացել էր ընդդիմադիր «Ապրելու երկիր»՝ Գրիգորյանի գլխավորությամբ։ ՔՊ-ն, չկարողանալով մեծամասնություն կազմել, կոալիցիայի էր կազմել «Դավիթ Մինասյան» դաշինքի հետ, և Մինասյանն ու Գյուլնազարյանը հերթով գլխավորել էին համայնքը։

Գյուլնազարյանը հրաժարական էր տվել 2024 թվականի նոյեմբերի 18-ին՝ նոյեմբերի 16-ին Երևանի Նազարբեկյան փողոցում տեղի ունեցած փոխհրաձգությանը ներկա գտնվելուց հետո, որի ժամանակ գնդակահարվել էր Ֆրանսիայից ժամանած տղամարդը՝ 42-ամյա Արթուր Մանուկյանը։ Ինքը՝ Գյուլնազարյանը, դեպքի ժամանակ ոտքի հրազենային վնասվածք էր ստացել։

2024 թվականի դեկտեմբերի 28-ին վարչապետ Նիկոլ Փաշինյանը Փարաքարի ղեկավարի ժամանակավոր պաշտոնակատար ընտրելու համար հայտարարել էր փրայմըրիզ։ Հունվարի 14-ին, նախնական ընտրություններում, հաղթել էր համայնքի նախկին ղեկավար Գյուլնազարյանը։ Նա ստացել էր 594 ձայն։ Համայնքի ավագանու արտահերթ ընտրությունները տեղի կունենան մարտի 30-ին։