Հանրապետության հրապարակում 4-րդ անգամ տնտեսվարողները բողոքի ակցիա են անցկացրել՝ ընդդեմ փոքր և միջին բիզնեսի շրջանառության հարկի 5%-ից 10% բարձրացման։
Նրանք պնդում են, որ հարկերի բարձրացումը կկործանի փոքր բիզնեսը, քանի որ դրանք այլևս շահութաբեր չեն լինի: Գործարարները մատնանշել են հարկային գերբեռնվածությունը և կառավարության որոշումն անհիմն անվանել։
«Դուրս է գալիս, որ տարեկան 12-13 մլն դրամի գործ անողը պիտի գա մտնի 10%-ի տակ։ Մանր բիզնես չունենք մենք»,- ասել է ցուցարարներից մեկը։
Մեկ այլ քաղաքացի նկատել է, որ նման որոշումներով իշխանությունները փորձում են յուրաքանչյուր քաղաքացու «գրպանը մտնել» և ազդեցության լծակներ ունենալ հասարակության բոլոր շերտերի վրա։ Ցուցարարները բարձրացրել են նաև սոցիալական այլ խնդիրներ՝ հայտարարագրման համակարգի թերություններ, տրանսպորտի նոր սակագներ, ավտոկայանատեղերի թանկացում, անգամ թափառող շների չլուծված խնդիրը։
Ակցիային մասնակցում էր ընդդիմադիր «Հայաստան» խմբակցության պատգամավոր Գառնիկ Դանիելյանը, ով կոչ է արել բոյկոտել նորամուծությունները և օրինակ բերել տրանսպորտի թանկացման դեմ առաջիկա գործողությունները։ Դանիելյանը չի բացառել, որ իշխանությունները կարող են դատարկ խոստումներ տալ ցուցարարներին հանգստացնելու համար և հիշեցրել է ավտոբուսների վարորդների չկատարված պահանջները։ Նոյեմբերին նրանք պահանջում էին աշխատանքային պայմանների բարելավում և աշխատավարձի բարձրացում, ինչը վաղուց էին խոստացել, սակայն քաղաքապետարանը նրանց «կրկին խաբել է»։
«Վարորդներին էլ խաբեցին։ Վարորդների ցույցից հետո ասացին՝ ձեր պայմանները կփոխենք, ձեր աշխատավարձերը կբարձրացնենք։ Ի՞նչ արեցին։ Ամիսը լրացավ, այդ վարորդները զանգեցին՝ ասում են, որ ոչ մի բան էլ չեն արել, որովհետև ամբողջությամբ սուտ է և կեղծիք, խաբում են»,- նշել է պատգամավորը։
2024թ․ մայիսի 2-ի նիստի ժամանակ կառավարությունը որոշել էր բարձրացնել փոքր և միջին բիզնեսի շրջանառության հարկի դրույքաչափը՝ գործող 5-ի փոխարեն սահմանելով 10%-ի սահմանաչափ։ Հարկային շեմի բարձրացմամբ՝ կառավարությունը նախատեսել էր 17,8 միլիարդ դրամի պետական եկամուտների աճ ունենալ։ 2024թ․ նոյեմբերի 7-ին կառավարությունը հավանություն էր տվել 2025թ․ հուլիսի 1-ից գործունեության 12 տեսակ հարկման ընդհանուր համակարգ ներառելու նախագծին, որով նրանք կզրկվեն հարկման հատուկ համակարգից (երբ վճարում են շրջանառության 5% հարկ և որպես միկրոբիզնես՝ 0%)։ Հարկման ընդհանուր համակարգով նրանք ստիպված կլինեն վճարել 20% եկամտային հարկ:
Փոքր և միջին բիզնեսի շրջանառության հարկի դրույքաչափը չբարձրացնելու պահանջով բողոքի ակցիաներ էին տեղի ունեցել նաև հունվարի 13-ին, 23-ին և 27-ին։
ԱԺ «Հայաստան» խմբացության պատգամավոր Թադևոս Ավետիսյանն Armenia Today-ին հայտնել էր, որ մի շարք մասնագիտություններ և ծառայություններ հատուկ հարկման համակարգից դուրս բերելու և հարկման ընդհանուր համակարգ ներառելու դեպքում հազարավոր փոքր բիզնեսներ կանգնելու են փակման ռիսկի առջև։ Նրա խոսքով՝ փոփոխությունը չի նպաստելու հարկային մուտքերի ավելացմանը, քանի որ գործունեությունը դադարեցնելու պատճառով փոքր բիզնեսը հարկ չի վճարելու։
