Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը BBC-ին տված հարցազրույցում Ֆրանսիային մեղադրել է միջազգային ոլորտում հակաադրբեջանական նախաձեռնությունների և հայ-ադրբեջանական խաղաղության գործընթացը խաթարելու մեջ։
«Դրանով Ֆրանսիան ոչ միայն վնասում է իր և ԵՄ-ի հեղինակությանը, այլև բացասաբար է անդրադառնում Հայաստանի և Ադրբեջանի միջև խաղաղության գործընթացի առաջմղման հեռանկարներին, ինչպես նաև խարխլում է Հարավային Կովկասի անվտանգությունը»,- ասել է նա՝ Ֆրանսիային մեղադրելով ՄԱԿ-ի Անվտանգության խորհրդում, ԵՄ-ում, Եվրախորհրդարանում և Ֆրանկոֆոնիայի միջազգային կազմակերպությունում իր անդամակցությունը չարաշահելու մեջ։
Նրա խոսքով՝ այսօր Բաքուն և Երևանը մեծ հնարավորություն ունեն մինչև տարեվերջ ավարտին հասցնելու խաղաղության պայմանագրի նախագծի շուրջ բանակցությունները։ «Դա կիրականացվի Բաքվի և Երևանի միջև ուղիղ երկկողմ բանակցությունների միջոցով՝ հիմնված հիմնարար սկզբունքների վրա, որոնք արտացոլված են խաղաղության համաձայնագրի նախագծում»,- ասել է Ամիրբեկովը։
Ադրբեջանի նախագահի օգնականն ընդգծել է, որ «3+3» հարթակը երբեք նախատեսված չի եղել որպես կոնֆլիկտային իրավիճակների լուծման հարթակ։
Հոկտեմբերի 23-ին Ֆրանսիայի պաշտպանության նախարարության ղեկավար Սեբաստիան Լեկորնյուն և ՀՀ ՊՆ ղեկավար Սուրեն Պապիկյանը ստորագրել են երկկողմ համագործակցության փաստաթղթեր, որոնք ներառում են պաշտպանության ոլորտում փոխգործակցությունը։
Ավելի վաղ Ադրբեջանի ԱԳՆ-ն Հայաստանին զինելու Ֆրանսիայի մտադրություններն անվանել էր Փարիզի փորձ՝ Երևանը «ներքաշելու» «ռազմական արկածախնդրության մեջ»։ Հայաստանի նախագահ Վահագն Խաչատրյանը հոկտեմբերի 6-ին France TV-ի եթերում ասել էր, որ Հայաստանի համագործակցությունը Ֆրանսիայի հետ ռազմական ոլորտում ուղղված չէ այլ պետությունների դեմ և ունի բացառապես պաշտպանական նպատակ։
