Նիդերլանդների խորհրդարանը Լաչինի միջանցքի վերաբերյալ բանաձև է ընդունել: Խորհրդարանը կոչ է անում երկրի կառավարությանը ԵՄ երկրների հետ ճնշում գործադրել Ադրբեջանի վրա՝ Լաչինի միջանցքն ապաշրջափակելու համար: Այս մասին ասվում է խորհրդարանի ընդունած բանաձևում, որի մասին հայտնել է Նիդերլանդների հայկական կազմակերպությունների ֆեդերացիան (FAON):
Բանաձևում ասվում է, որ միջանցքի շրջափակումը շարունակվում է,ինչի հետևանքով Լեռնային Ղարաբաղի բնակչության համար հումանիտար իրավիճակը վատթարանում է: Նշվում է նաև, որ Ադրբեջանն անտեսել է Լաչինի միջանցքի վերաբացման կոչերը, իսկ ռուս խաղաղապահները չեն կատարում Հայաստանի, Ռուսաստանի և Ադրբեջանի միջև կնքված պայմանագրի պայմանները:
Խորհրդարանը դիմել է Նիդեռլանդների կառավարությանը՝ խնդրելով ԵՄ մակարդակով դիտարկել, թե ինչպես կարելի է ուժեղացնել ճնշումն Ադրբեջանի վրա՝ շրջափակումը դադարեցնելու նպատակով: Նշվել է այդ գործընթացում ԵՄ-ում համախոհ երկրներին ներգրավելու անհրաժեշտության մասին։
FAON-ը ողջունել է խորհրդարանի կողմից բանաձևի ընդունումը՝ Նիդերլանդների կառավարությանը, ԵՄ-ին և միջազգային հանրությանը կոչ անելով Լեռնային Ղարաբաղում հումանիտար աղետը դադարեցնելու միջոցներ ձեռնարկել:
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել են Ստեփանակերտ-Գորիս մայրուղին: Արցախի ԱԽ նիստում որոշում է կայացվել նամակով դիմել ՌԴ խաղաղապահ զորակազմի հրամանատարությանը: Հայաստանը հայտարարել է ԼՂ հայերի իրավունքների ապահովման միջազգային մեխանիզմների գործարկման անհրաժեշտության մասին:
Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
