The Economist Intelligence Unit ոչ կառավարական կազմակերպությունը (բրիտանական Economist ամսագրի վերլուծական ստորաբաժանում) հրապարակել է ժողովրդավարության մակարդակով երկրների վարկանիշը՝ «2021 թվականի աշխարհի երկրների ժողովրդավարության ինդեքսը» (Democracy Index 2021):
«2021 թվականի ժողովրդավարության ցուցանիշ» ամենամյա զեկույցում Հայաստանը 165 երկրների շարքում զբաղեցրել է 89-րդ տեղը։ Ինչպես և նախորդ տարի, Հայաստանն ընդգրկվել է կառավարման հիբրիդային ռեժիմ ունեցող ժողովրդավարական երկրների ցանկում։ Հետազոտության նյութերում նշվում է, որ Հայաստանում ժողովրդավարական ռեժիմի գնահատման մեջ ոչ էական առաջընթաց է գրանցվել (0,14 բալ՝ 2020 թվականի համեմատ): Հայաստանը 5,49 միավոր է ստացել (5,35 միավոր՝ 2020 թվականին)։
Նշվում է, որ 2021 թվականի հունիսի 20-ին տեղի ունեցած արտահերթ խորհրդարանական ընտրությունները դժգոհության շրջանից հետո վարչապետ Նիկոլ Փաշինյանին տվեցին ուժեղ հասարակական մանդատ, իսկ «Փաշինյանի և նրա «Քաղաքացիական պայմանագիր» կուսակցության վճռական հաղթանակը որոշակի կայունություն բերեց 2020 թվականի ռեցեսիայից և Ադրբեջանի հետ պատերազմից հետո, ինչը կառավարությանը թույլ տվեց շարունակել ժողովրդավարական բարեփոխումների իր ծրագիրը»:
Հետազոտության հեղինակները նաև նշում են, որ չնայած արդյունքների որոշ բարելավմանը, Հայաստանում ժողովրդավարության վերաբերյալ մտավախությունները պահպանվում են. դատական իշխանության անկախությունը դեռևս հարցականի տակ է, իսկ ընդդիմությունը մարգինալացված է:
Ադրբեջանը, որը ստացել է 2,68 միավոր, հայտնվել է ավտորիտար քաղաքական ռեժիմ ունեցող երկրների ցանկում։ Այդ երկրում, ինչպես Տաջիկստանում և Ուզբեկստանում, բարելավում չի արձանագրվել։ Այդ երկրները հանրային դժգոհությանը պատասխանեցին ռեպրեսիվ միջոցներով, ինչը հանգեցրեց ոչ ժողովրդավարական պրակտիկաների հետագա արմատավորմանը և այլախոհության ցանկացած ձևի ճնշմանը։
Իրավիճակի վատթարացում է գրանցվել Վրաստանում, որը ստացել է 5,12 միավոր։ Այդ երկիրը վարկանիշում պահպանել է 91-րդ տեղը՝ գտնվելով Լիբերիայի և Հոնդուրասի միջև: Երկրում ժողովրդավարական գործընթացներին խոչընդոտող գործոնների թվում նշվում է լարվածությունը իշխող «Վրացական երազանք-Ժողովրդավարական Վրաստան» կուսակցության և ընդդիմադիր Միացյալ ազգային շարժման միջև, որն ավարտվել է նախկին նախագահ Միխեիլ Սահակաշվիլիի ձերբակալությամբ: Նշվում է նաև, որ վերջին տեղական ընտրություններն անցկացվել են խախտումներով։
Ժողովրդավարության հետ կապված իրավիճակի վատթարացում է արձանագրվել նաև Թուրքիայում, որը ստացել է 4,35 միավոր։ Հետազոտության հեղինակները նշում են նախագահ Ռեջեփ Թայիփ Էրդողանի ավտոկրատական կառավարումը և կառավարության նկատմամբ հանրային վստահության նվազումը: Հաղորդվում է, որ մակրոտնտեսական կայունության առումով դժվարությամբ ձեռք բերված առաջընթացը խափանվել է գների աճի, տեղական արժույթի արժեզրկման և քաղաքական սխալների հետևանքով:
