ԱՄՆ նախագահ Դոնալդ Թրամփը հայտարարել է, որ փոխնախագահ Ջեյ Դի Վենսը, ամենայն հավանականությամբ, կդառնա Հանրապետական կուսակցության թեկնածուի ֆավորիտը 2028 թվականի նախագահական ընտրություններում։ Այս մասին հայտնում է FOX News-ը։
Թրամփն այդ հայտարարությունն արել է Լոս Անջելեսում 2028 թվականի Օլիմպիական խաղերի նախապատրաստման աշխատանքային խմբի ստեղծման մասին հրամանագրի ստորագրման ժամանակ։ Միջոցառման ընթացքում Fox News-ի ավագ թղթակից Փիթեր Դուսին հարց է ուղղել Թրամփին՝ արդյոք նա Վենսին համարում է «Make America Great Again» (MAGA) շարժման ժառանգորդը՝ հաշվի առնելով, որ ինքը չի պատրաստվում առաջադրվել երրորդ ժամկետով։
«Կարծում եմ՝ դա միանգամայն հավանական է։ Ի վերջո, նա փոխնախագահ է», – պատասխանել է Թրամփը:
«Կարծում եմ՝ Մարկո Ռուբիոն նույնպես կարող է ինչ-որ ձևաչափով միանալ նրան։ Մենք ունենք նաև այլ բացառիկ մարդիկ՝ նույնիսկ նրանք, ովքեր հենց հիմա այս բեմի վրա են։ Բայց, անկասկած, Վենսը հիանալի է գործում, և այս փուլում, ամենայն հավանականությամբ, նա կլինի ֆավորիտը»,- ասել է նա։
Թրամփը նաև ընդգծել է, որ իր կաբինետի այլ անդամներ նույնպես կարող են շարունակել MAGA շարժումը։ Նա չի բացառել, որ պետքարտուղար Մարկո Ռուբիոն Վենսի հետ կարող է ուժեղ տանդեմ կազմել։
Հիշեցնենք, որ Ռուբիոն 2016 թվականի նախընտրական փուլում մրցակցել է Թրամփի դեմ, սակայն հետագայում դարձել է նրա դաշնակիցը։ Նախորդ ամիս նա Fox News-ի եթերում հայտարարել էր, որ չի դիտարկում 2028-ին առաջադրվելու տարբերակը և աջակցում է Վենսի թեկնածությանը։
