Ռուսաստանի Կամչատկայի երկրամասում հուլիսի 30-ի առավոտյան տեղի է ունեցել 8,7 մագնիտուդ ուժգնությամբ երկրաշարժ, ինչի հետևանքով Հյուսիսային Կուրիլսկի ափամերձ գոտում ցունամի է գրանցվել, հաղորդում է ՏԱՍՍ-ը:
ՌԴ ԳԱԱ միասնական գեոֆիզիկական ծառայության Կամչատկայի մասնաճյուղի տվյալներով՝ երկրաշարժը գրանցվել է Պետրոպավլովսկ-Կամչատսկ քաղաքից 150 կմ հարավ-արևելք՝ 17 կմ խորության վրա։
Ավելի քան 8 ցնցում է արձանագրվել Կամչատկայի ափերի մոտ մեկ ժամվա ընթացքում։ Ցունամին հասել է մինչև 3-4 մետր բարձրության: Բնակիչները շտապ տարհանվել են բարձրադիր տարածքներ։ Տուժել է տեղական նավահանգիստը և ձկնարդյունաբերական ձեռնարկությունը։
Հաղորդվում է, որ Պետրոպավլովսկ-Կամչատսկում փլուզվել է մանկապարտեզի (№15) պատ, զոհեր չկան։
Ցունամին հասել է նաև Հյուսիսային Ճապոնիա՝ մոտ 30 սմ բարձրությամբ։ Ճապոնիայի ինքնապաշտպանության ուժերն անօդաչու սարքեր են գործարկել իրավիճակի մոնիթորինգի համար։ «Ֆուկուշիմա-1» ԱԷԿ-ում դադարեցվել է մաքրված ջրի արտահոսքը։ Երկրի կենտրոնական և հյուսիսարևելյան հատվածներում ընդհատվել է որոշ գնացքների երթևեկություն։ Վնասների կամ վիրավորների մասին տեղեկություններ չկան։
ԱՄՆ Օվկիանոսային և մթնոլորտային վարչությունը նույնպես հայտարարել է ցունամիի սպառնալիքի մասին։ Հավայան կղզիների Օահու կղզու ափամերձ բնակչությանն անհապաղ տարհանման հրահանգ է տրվել։
Ցունամիի սպառնալիք է հայտարարվել Կամչատկայում, Կուրիլյան կղզիներում, Ճապոնիայում, ԱՄՆ մի շարք նահանգներում։ Համացանցում տարածվել են տեսանյութեր, որոնցում երևում է, թե ինչպես է ցունամին հեղեղում ափին գտնվող շենքերը։
